Diasabra anochi manece diadomingo polis a presenta na e adres Mahuma 4E p’un molester di zonido. Na yegada di e patruya a constata hopi hende den un cura’i cas. Ora nan a mira polis, tur hende a plama fo’i otro. Tin a bula cura mientras otro nan a bay sconde den e cas. Mesora a pidi refuerso di demas unidad.
Polis di tur districto a presenta. A drenta mondi pa busca e grupo cu a bula cura. Algun a logra huy na pia mientras mas cu binti a perde nan libertad. Den mas cu tres transporte policial a transporta e personanan pa warda di polis.
E grupo aki a burla di toque de queda y e reglanan cu gobierno y Crisis Team a implementa. Na warda, un subfiscal a splica nan e proceso di multa djey nan a bay sosega nan curpa tra’i tralie. Cu e grupo aki so, a genera mas cu binti mil florin pa cah’i gobierno.
