Diadomingo anochi a pidi intermediacion di polis pa dos cacho cu a bringa cu otro. Ta trata aki di un cacho rasa Pitbull cu a herida un cacho crioyo seriamente. E caso a tuma luga na altura di Silva Tire Shop na Mahuma. Testigonan a mira con e Pitbull a ataca y bringa cu e otro cacho, cu finalmente a bay drumi den cura di e negoshi.
Doño di e tire shop a yega na e sitio y a bisa polis cu e no sa di ken e cacho Pitbull ta. Esun crioyo sa frecuenta den e area, pero no ta kere cu e tin doño. Mas bien ta consider’e un “cacho di caya”. Polis a logra localisa e Pitbull net eybanda mes den rooi, pero prome cu nan por a haci algo, ya e cacho a drenta bou di e brug chikito y despues a disparce den mondi. A busc’e pero sin resultado.
Polis a purba haya sa eybanda ken ta doño di e Pitbull pasobra separa di por ta un menasa pa otro cacho, e por ta un menasa pa hende tambe mirando con agresivo e ta. Polis tin atencion pa e caso aki.
