Definitivamente tabatin un trapamento di tenchi den parlamento di parti di drs. Mervin Wyatt-Ras, parlamentario di fraccion di AVP, despues di un atake di parti di Prome Minister, mr. Evelyn Wever-Croes kende tabata hopi defensivo den su palabranan.
E prome mandatario a insinua cu Wyatt-Ras no tin gevoel pa e sufrimento di pueblo cu COVID ocasiona. Por ta Wyatt-Ras caminda cu e ta biba, riba su pedestal no ta ripara esey. Pueblo ta den sufrimento. Den casnan di pueblo por sinti esey e mandatario a indica den Parlamento.
Di parti di Wyatt-Ras, e ta splica cu ta pa e motibo ey mes pueblo no kier mira e gobierno actual. Ta p’esey e prome minister a entrega e retiro como gobierno.
Wyatt-Ras a splica cu MEP a anuncia tres luna pasa cu a cuminsa campaña, a bin cu logo nobo y aworaki cu a drenta cas di pueblo, a ripara cu hendenan no kier nan mas.
E ta sigui splica cu na prome instante a bay Parlamento pa asina haya informacion riba COHO (Caribisch Orgaan voor Hervorming en Ontwikkeling) cu ta bay bin den un Rijkswet. Tin un conseho di Raad van Advies riba dje.
AVP a bin pa haya informacion, pero no a haya esaki. Ta trata aki di un gobierno cu ora cos a bira cayente, a bula pipa. E prome minister no a asumi su responsabilidad. A hinca tur hende cu Landspakketten. E mes ta lanta bela bay y laga pueblo keda cu ne.
Segun Wyatt-Ras, esey a cay den mal tera cerca e prome mandatario. A cuminsa e ora ta tira palabra y haci comosifuera cu Wyatt-Ras no tin curason pa pueblo, aunke cu e ta bin di sector social. Esey no ta cuadra cu realidad. Tur hende conoce Wyatt-Ras, kende ta sali na defensa di sector social y a sa di haci preguntanan critico.
Hasta minister Glenbert Croes a tira den su cara cu no a sostene Crisis Plan Social. Wyatt-Ras a enfatisa cu el a sostene Crisis Plan Social ora cu el a bin como un ley. Si a pone presion cu e mester a bin den un ley y no djis yega bin cu un plan.
Un cos tambe cu minister a reacciona ta riba FASE, haci como si fuera cu AVP no lo kier FASE y tilda cu no ta para banda di pueblo. Tur esaki tabata preguntanan cu Wyatt-Ras a haci. Hopi ciudadano ta bay, pidi FASE y no ta tende nada mas. No ta yuda nan y tin cu biba di famia. Nan no a haya ni pakete di cuminda. P’esey a haci pregunta si por yama un caminda. E personanan ta yama pero no ta haya contesta, e parlamentario a enfatisa.
