Peter Correa, ta propietario di e truck di cuminda rapido, Check in Station, cu antes tabata sita patras di La Ronda y cu a muda pa algun tempo caba riba L.G. Smith Boulevard, riba e tereno unda antes tabata Bushiri Beach Hotel. Ayera tabata un dia poco comun na Aruba, despues di cu na april 2019 nos a conoce un blackout total di coriente, paralisando nos economia completamente.
Tur hende cu kier a come, a haya nan diripiente cu masha poco opcion pasobra mayoria restaurant a haya nan ta cera nan portanan debi cu sea no tabatin coriente pa por a habri, pa nan aparatonan funciona den cushina of pa procesa e cachinan di banco pa pago. Consecuentemente, e trucknan di cuminda a haya un chens unico pa por sigui bende sin problema. Nan mester di djis un generator chikito pa por abastece coriente y cla, pasobra lo de mas ta traha cu gas mas tanto y pa nan cobra efectivo of uza mashin cu ta traha cu sim di celular ta normal caba.
E truck di cuminda maneha pa e conocico Peter Correa, conoci tambe como “Truck di Piet” tabata druk ayeranochi, tanto cu local pero tambe cu turista.
Cu un sonrisa riba su cara Piet a conta cu nan ta traha riba delco debi cu Elmar no kier pone coriente p’e. Na momento cu e blackout a presenta, nan a sigui traha normal riba delco. “Nos a sigui draai manera nad’un pasa, cu excepcion cu diripiente mi a haya mi cu fila largo di hende mi dilanti.”
Correa a expresa cu “Locual tabata malo pa un, tabata bon p’ami. Mi a saca mi dia manera mester ta.” Piet a corda tur hende cu desde cu covid a presenta na Aruba, a aplica un sin fin di medida cu a afecta e trucknan di cuminda masha pisa mes. Nan a haya nan mes ta “struggle” pa lunanan largo, specialmente debi cu nan mester a cera completamente prome y despues mester a conforma cu habri durante orario limita.
Piet tin un aña sin mira un benta manera esun di ayera, aunke cu pocopoco e benta ta subiendo si. Awe por bisa trankilamente cu e perdida di algun tabata ganashi pa Truck di Piet, pa cual e ta gradici Dios pa con e benta a bay rib’e anochi di blackout. El a sigura di sigui traha duro pa ofrece cuminda crioyo, cushina fresco bo dilanti y na un prijs pagabel pa tur hende.
