Riba 8 di mei ultimo Parlamento di Aruba a trata e ley riba matrimonio di mesun sexo. Un ley presenta pa e fraccionnan Accion21, MAS y RAIZ. E t’un ley cu a trece masha discusion den pueblo y claro den e partidonan tambe. Por lo menos den MEP y AVP, a mira un separacion ora di vota. Den AVP, tres a vota na fabor y dos a vota contra. Den MEP, ocho a vota contra y solamente un parlamentario a vota na fabor.
Ta trata aki di Parlamentario Setty Yarzagaray, den henter su fraccion e t’e unico cu a vota na fabor. E tempo ey el a indica cu den famia un tin un ruman cu ta gay y cu e tin cu para p’e. Pues mas bien un votamento pa sostene e miembro di famia. Recientemente durante un entrevista cu 24ora.com el a conta cu tabata dificil como miembro di MEP vota na fabor mirando cu henter e fraccion a vota contra, claro; el a respeta nan decision y nan di dje.
Segun e parlamentario, e tabata desea pa tin un referendum riba e topico aki, pero ley no a permiti. Ta dos biaha e grupo cu a entama caso contra gobierno, gobierno a perde. Tanto den corte di prome instancia como den apelacion, awo ta wardando riba sentencia di Corte den Casacion. Pero tur cos ta indica cu Aruba ta discrimina, mirando e conseho cu advocaten-general a duna na Corte den Casacion.
Setty ta keda para riba su punto y no lo cambia, e ta PRO y lo keda PRO. E no ta facil ora ta desvia di otro pero e parlamentario ta consciente cu tin un grupo cu ta sostene.
