Minister di Asuntonan Economico, Geoffrey Wever, a bisa cu stabilidad na un pais ta un factor cu semper comerciantenan ta tene na cuenta na momento cu busca oportunidadnan pa inverti.
E mision comercial pa Surinam ta dirigi riba comercio y no necesariamente ta nifica haci inversion na Surinam. Ta pensa mas bien riba e posibilidad di exporta no solamente producto, pero tambe conocemento pa e pais aki, cu un tempo tabata forma parti di Reino Hulandes. E por ta vice versa tambe, esta importa producto y experticio for di e pais ey.
Datonan acumula ta mustra cu ya caba tin companianan local cu ta haci uzo di experticionan cu tin na e pais ey, door di e escasez riba e mercado laboral na Aruba. “Tin cierto bentahanan den haci negoshi cu un pais cu ta cera di bo.”
E motibo cu ta haci e biahe den forma di un mision comercial, ta pa crea mas oportunidad cu por haya ora cu un comerciante dicidi di bay riba su mes y su so. Individualmente e gastonan ta mas halto, por ehempel pa importa producto, compara cu ora cu haci esaki den grupo. Tambe logistica y costa di fleta ta bira mas dificil individualmente compara cu ora bo ta den grupo. Principalmente ora di trece un cantidad mas grandi di container, ta haci cu e gasto ta baha y tambe por ofrece e productonan na un miho prijs. “E motibo cu nos ta haci esaki ta pa habri caminda pa nos empresarionan. Lo organisa match-making, cu ta un oportunidad cu nan lo no tin si biaha riba nan mes. Door cu ta drenta como gobierno cu e sector comercial, tin tur cos prepara pa topa un grupo mas grandi di comerciantenan di Surnam.”
Riba nivel gubernamental tambe lo tin diferente reunion cu lo contribui na crea e lasonan necesario y mustra cu gobierno di e dos paisnan aki ta apoya e tipo di desaroyo aki. “E ta mustra e deseo di haci mas comercio cu otro.”
