Un accidente basta fuerte cu diferente persona herida a tuma luga na crusada di Sero Pita. Un persona tabata pega den auto mientras otro a bira malo un rato despues na sitio.
Esaki a tuma luga na e crusada peligroso di Sero Pita na Paradera. Den careda di 3:30 pm a bati alarma pa un auto pega den mondi. A scucha un impacto fuerte cu a pone tur hende den area riba pia. E acidente tabata entre un v-wagen Hyundai Accent blanco y un Ford Edge shinishi scur. Segun informe ricibi na sitio, a indica cu e accidente lo tabata pa falta di preferencia. E Ford Edge a bay para te den mondi mientras cu e Hyundai tabata meymey caminda. Dos persona a resulta herida y un di e ocupantenan pega den e vehiculo.
Tur autoridad concerni a presenta na sitio, entre otro e materiaalwagne di brandweer pa asina libera e persona herida for di e situacion cu e tabata aden. Tin di menciona tambe cu na prome instante no tabatin herido pa locual ta trata e otro vehiculo, pero un rato despues a cuminsa tuma nota cu un hoben ocupante lo a cuminsa sinti malo y a opta pa drumi bandi caminda cu dolor inmenso na su curpa.
Personal di ambulance tabata man yen atendiendo cu cada herido na sitio. Un total di tres ambulance a presenta y a transporta cada persona herida direccion hospital. E crusada tabata basta rato cera pa asina tuma tur datos y compila informacion pa e investigacion.