Perla Gymnastics Aruba a biaha pa Merca y representa nos isla. Pa varios luna nan a train p’e competencia aki caminda mas di 18 pais a competi p’e medaya di oro. Miguel Arrebola kende ta presidente di Perla Gymnastics a conta cu e competencia cu a tuma luga na Miami tabata riba un nivel basta halto. E muchanan a presenta hopi bon, pues nan ta orguyoso di nan.
Mas aleu el a sigui conta cu practicamente e 80% di nan competencia tabata procedente di Rusia. Den e mundo di “ritmica” e miho atletanan di mundo ta procedente di Rusia. Perla Gymnastics Aruba tabatin e honor di conoce hopi atleta olimpico, cu a yega di gana medaya di olimpiada caba.
Adriana Arrebola, Head Coach di Perla Rhythmic Gymnastics, a splica cu nan a competi den e sistema USAC U.S.A. Gymnastic. E muchanan a participa den nivel 3-4-5 y 7. Practicamente cada catergoria tabata tin 50 mucha y e muchanan di Perla Gymnastics a sali entre e di 3 cu 5 luga. Competencia tabata basta pisa, pero nan a haci nan best. Esaki ta e prome competencia cu nan a participa na dje despues di tres aña di pandemia.
Nan ta e unico club di rhythmic gymnastic y esey ta haci cu nan tabatin basta tempo sin competi. E siguiente competencia lo ta Aruba International 2022, Arrebola ta spera cu Aruba por sigui apoya e muchanan.
Tin varios pais cu a confirma nan participacion p’e competencia aki cu lo ta den luna di november. Entre e paisnan aki ta: Bolivia, Ecuador, Colombia, Belgica y tambe Merca.
E atletanan ta entre 7 cu 17 aña. N’e momentonan aki ta dialogando pa trece un coach di afo. E ta un persona bon prepara pa loke ta trata rhythmic gymnastic. E club tin dos categoria pues artistico y ritmico. E persona cu nan ta purbando di trece tin nivel halto den e mundo di ritmica.
