Durante su entrevista diaranson merdia den Enfoke, lider di Partido di Pueblo Arubano (AVP), mr. Mike Eman a reacciona riba e declaracionnan haci recientemente pa colega parlamentario Miguel Mansur di Accion 21. Mansur lo a haci un atake personal den Eman su direccion basa riba un encuesta cu el a laga traha recientemente y lo ta indica un rechaso pa politiconan cu mas experiencia. Eman ta kere hustamente e tipo di actitud y ponencia aki ta forma parti di loke mester percura pa cambia cu tempo na Aruba, ya cu no ta aporta nada positivo na e pais y ta lamenta cu e atake a bin hustamente for di Mansur, un politico cu den pasado su mes a saca man pa defende for di atake di otro politico.
E ta referi na e momento durante un debate aña pasa ora cu tur participante tabatin un as (comodin) pa uza ora cu no tabata nan beurt pa papia, pero toch kier a bisa algo. E oportunidad ey cu, en realidad tabata destina pa defende cada ken su partido of nan mes, Eman a uza pa defende Mansur ora cu Evelyna Wever-Croes a atac’e como un persona cu a caba di yega Aruba y no sa di nada. Eman a bisa cu el a haci esey riba e conviccion cu cualkier persona profesional of otro cu si a yega Aruba ayera of e tabat’ey di tur tempo, pero e kier yuda y contribui na e pais, e atake ey sigur no ta na su luga.
Pa e motibo ey Eman ta ironico cu Mansur si a opta pa rebaha su mes na e nivel aki. A categorisa cu Eman y AVP su pensamentonan cu no ta di e tempo aki mas, pero Mansur mes ta practica un politica di Sr. Nel Oduber pasobra ta e tipo di política aki di purba stigmatisa hende y haci profiling. Como ehempel, Eman a duna e biaha cu Oduber a yama tur polis na Aruba pa padvinder; esunnan di Raad van Advies ora nan bin cu conseho negativo a bisa cu nan ta un team di domino y e maestronan di scol den protesta grandi pa nan salario, a bisa cu nan no ta traha, cu merdia nan ta duna poco bijles anto anochi ta bay casino.
“E tipo di mentalidad ey no ta pas den hendenan cu ta bisa cu nan kier ta parti di un politica nobo; e tipo di profiling ey. Na Merca tabatin un eleccion caminda Hillary Clinton a yama tur e votadonan di Trump pa deplorables (bagaso) y nos sa kico a pasa cu Hillary Clinton despues cu e no a gana eleccion. Mitt Romney a yama cierto momento tur e votadonan di Obama, paso hopi di nan ta hende pober y riba bijstand como free loaders, hendenan cu ta haya cabey boto di gobierno y nos sa kico a pasa cu Mitt Romney. Mi no ta kere den politica e tipo di profiling ta un contribucion na politica. Mi ta kere cu Aruba ta spera di nos un caminda pa cana inspira,” Eman a bisa den e entrevista na Enfoke.
El a remarca tambe cu hopi biaha nan no ta papia bunita di dje, pero e nunca a yama nan pa garbage. Pa bo yama bo coleganan pa garbage. “Aruba mester di politiconan bieu, hoben, experiencia; no ta importa di cua generacion, pero nan mester tin nivel y curason pa sirbi e pais aki y mucho menos nan mester cana cu rabia of odio pa bringa nan contrapartidarionan.”
Si bo tin algo pa motibo cu e tin efecto riba e vision y e calidad di gobernacion ta un cos, pero ora cu e ta bay den direccion di profiling y yama otro pa garbage, Eman ta considera esaki como robes y ta spera cu ta en berdad un eror di momento pasobra e ta compronde cu tur hende ta desaroyando nan politica.
Eman ta sinti cu e sosten di partido AVP semper tabatin un base hopi amplio y grandi cu coyuntura. “Tin biaha nos a gana, tin biaha nos a perde. Nos tey pa 80 aña. Nos a conoce momentonan gloria y nos a conoce momentonan di renobacion y cambio y AVP ta preparando pa no ta dependiente di partidonan cu ta fly by night.
Den un proximo eleccion nan kier un mandato di pueblo pasobra e trabou ta hopi grandi. E tipo di coalicion cu a mira den pasado cu e partidonan chikito no tin e fundeshi, ni e compromiso riba termino largo. “Nan t’ey un rato pa purba un cos, pero si e no logra, nan a bay. Nos t’ey for the long run. Den bon y den malo y pa percura cu e pais aki por conoce momentonan bon atrobe y esey ta e compromiso cu nos a haci. Mi ta kere cu pueblo mes ta sinti den nan curason y alma ora bo compromiso ta serio, djis warda wak con pueblo ta responde.”
