Mester transporta prosperidad economico den bienestar pa pueblo!
Presidente di Commissie voor Koninkrijksrelaties (KOREL) di Eerste Kamer, Paul Rosenmöller, a expresa su aprecio pa e plan di Gobierno di Aruba pa aumenta salario minimo den tres fase, di Afl. 2.100 te Afl. 2.600, cu e obhetivo di acerca salario minimo na e nivel necesario pa subsistencia (bestaansminimum) y reduci pobresa na Aruba. Rosenmöller a haci e declaracion aki despues di un reunion na Eerste Kamer na Den Haag cu Prome Minister Mike Eman, Minister Plenipotenciario di Aruba na Hulanda, Mildred Schwengle, y Minister di Turismo, Transporte y Labor, Wendrick Cicilia. Durante e reunion, e comision a trata diferente tema di importancia pa Aruba, incluyendo desaroyo economico, turismo, diversificacion di economia, salario minimo, bienestar social y cambio climatico.
Turismo mester genera mas bienestar pa pueblo di Aruba
Rosenmöller a destaca cu turismo ta e pilar principal di economia di Aruba, pero cu un di e retonan ta pa percura cu mas di e entrada genera door di turismo keda circulando den economia local y beneficia comunidad Arubano. E presidente di KOREL a indica cu durante e reunion, miembronan di e comision a haci pregunta tocante e cantidad di empleado den sector turistico cu ta gana salario minimo. E discusion aki ta conecta directamente cu e vision di Prome Minister Eman pa transforma e prosperidad economico cu Aruba ta conoce den un miho bienestar pa pueblo. Rosenmöller a remarca cu, a pesar di e prosperidad economico di Aruba, ainda tin pobresa y diferencia social cu mester haya atencion.
Aumento di salario minimo den tres fase
Un di e puntonan cu a impresiona Rosenmöller tabata e plan di gobierno pa aumenta salario minimo di Afl. 2.100 te Afl. 2.600 den tres fase. Segun e presidente di KOREL, e diferencia actual entre salario minimo y e minimo necesario pa subsistencia ta aproximadamente Afl. 500. Rosenmöller a califica e iniciativa di gobierno como un paso importante pa reduci pobresa y disminui e diferencianan social riba nos isla.
Cambio climatico y cooperacion cu Wageningen University
Durante e reunion, e comision a dedica atencion tambe na cambio climatico y su impacto riba Aruba, tanto riba tera como den lama. Rosenmöller a expresa su impresion positivo di un presentacion di Wageningen University & Research (WUR), cu a establece un Memorandum of Understanding (MoU) cu Aruba pa fortalece cooperacion den diferente area di importancia pa e futuro di nos isla.
Segun Rosenmöller, e prioridadnan presenta door di Prome Minister Eman y Minister Cicilia a haya un bon acogida den Eerste Kamer, particularmente e enfasis riba bienestar social y e necesidad pa prepara Aruba pa e efectonan di cambio climatico.
Eerste Kamer ta gradici Mike Eman pa su dedicacion
Na final di e reunion, e miembronan di Eerste Kamer a dedica atencion special na e despedida di Prome Minister Mike Eman, kende lo finalisa su funcion como prome minister na 1 di januari 2027. Rosenmöller a expresa su gradicimento pa e dedicacion di Eman na estrecha e relacionnan entre Aruba y Hulanda den Reino. El a destaca cu e conocemento, experencia y pasion di Prome Minister Mike Eman lo sigui ta di importancia pa fortalece y mehora e lasonan den Reino den futuro.
