Fortalece educacion na Aruba, promove exito academico di nos studiantenan na Hulanda y explora oportunidadnan nobo pa cooperacion internacional. Esakinan tabata algun di e temanan central durante un encuentro entre Minister di Enseñansa, mr. Gerlien Croes, y Alexandra van Huffelen, presidente di Directiva di Radboud Universiteit na Hulanda.
E reunion, cu a tuma luga diabierna ultimo, a brinda un oportunidad valioso pa intercambia pensamento y ideanan tocante e desafionan y oportunidadnan cu educacion ta enfrenta, tanto na Aruba como internacionalmente. Un enfasis particular tabata poni riba e importancia di fortalece relacionnan cu institucionnan di enseñansa superior na Hulanda, cu por contribui na desaroyo academico y profesional di nos hobennan.
Exito di estudio y ‘brain gain’ como prioridad
Un di e temanan importante durante e encuentro tabata e exito di estudio di e studiantenan Arubiano cu ta sigui nan formacion academico na Hulanda.
Pa Minister Croes, ta esencial pa sigui explora strategianan cu por contribui na un trayectoria educativo exitoso, teniendo cuenta cu e desafionan academico, social y personal cu nos studiantenan por enfrenta ora nan continua nan estudio den exterior.
Na mes momento, a dialoga tocante e concepto di ‘brain gain’, cu ta enfoca riba con Aruba por beneficia di e conocemento, experencia y habilidadnan cu e studiante- y profesionalnan ta adkiri internacionalmente.
“Cada hoben Arubiano cu ta sigui su estudio den exterior ta representa un inversion den futuro di nos pais. Nos responsabilidad ta pa sigui crea conexionnan cu por contribui na nan exito academico y, na mes momento, explora con e conocemento y experencia cu nan ta adkiri por agrega balor na desaroyo di Aruba. ‘Brain gain’ no ta solamente tocante regresa na Aruba, sino tambe tocante mantene e conexion cu nos talento, unda cu nan ta den mundo”, e mandatario a expresa.
Segun Minister Croes, cooperacion cu universidadnan manera Radboud Universiteit por brinda oportunidad pa intercambia experencia y explora acercamentonan cu por fortalece e sosten y preparacion di nos studiantenan.
Educacion den era digital y e impacto di inteligencia artificial
Otro tema central durante e reunion tabata e transformacion di educacion den e era digital, particularmente e rol creciente di inteligencia artificial (AI) den proceso di siñamento, investigacion y futuro di mercado laboral.
E desaroyonan tecnologico ta cambia e manera cu conocemento ta comparti, e habilidadnan cu futuro profesionalnan mester desaroya y e preparacion cu institucionnan educativo mester brinda na nan studiantenan.
E mandatario a destaca cu Aruba mester sigui participa activamente den e dialogonan internacional aki, pa asina identifica oportunidad pa modernisa educacion y prepara nos hobennan pa un mundo caminda tecnologia y innovacion ta hunga un rol cada bes mas importante.
“Inteligencia artificial y digitalisacion ta transforma e mundo rond di nos. E pregunta no ta solamente con nos ta incorpora tecnologia den educacion, sino con nos ta prepara nos studiantenan y educadornan pa uza e posibilidadnan aki di manera responsabel, critico y creativo. Nos kier un sistema educativo cu ta prepara nos hobennan no solamente pa e trabounan di awe, sino tambe pa e oportunidadnan di mañan”, Minister Croes a enfatisa.
E dialogo ta conecta cu e vision di Learning Cities Aruba, cu ta promove siñamento continuo, intercambio di conocemento y preparacion pa e cambionan social, tecnologico y economico cu ta influencia nos comunidad.
Cooperacion internacional pa fortalece educacion na Aruba
Durante e encuentro, minister y van Huffelen a intercambia ideanan tocante diferente posibilidad di cooperacion entre Aruba y Radboud Universiteit, cu por contribui na fortalecemento di educacion, desaroyo di talento y intercambio di conocemento.
Pa Ministerio di Educacion, e relacionnan cu institucionnan academico internacional ta representa un oportunidad pa conecta Aruba cu experencia y conocemento specialisa, y pa explora strategianan cu por beneficia tanto nos studiantenan como nos sistema educativo.
E reunion a crea un base positivo pa sigui profundisa e dialogo y evalua e posibilidadnan di cooperacion den e periodo venidero. Minister a destaca cu e intercambio ta un paso inicial importante, caminda e ideanan comparti por wordo desaroya mas aleu den acercamentonan concreto.
“Nos ta kere den e poder di cooperacion y intercambio di conocemento. Aruba tin hopi potencial, y door di construi relacionnan fuerte cu institucionnan academico internacional nos por sigui amplia e oportunidadnan pa nos studiantenan, nos educadornan y nos pais.
E reunion aki a brinda diferente perspectiva y posibilidad cu nos lo sigui explora den e tempo venidero, cu e meta pa fortalece educacion y crea mas oportunidad pa nos talento Arubiano”, e mandatario a indica.
Un vision comparti pa futuro di nos hobennan
Minister Croes a conclui enfatisa cu inversion den educacion no ta limita na infrastructura y programa educativo, sino ta inclui tambe construccion di relacionnan strategico, innovacion y e desaroyo di oportunidadnan cu ta conecta nos hobennan cu e mundo.
“E futuro di Aruba ta depende di e preparacion cu nos ta brinda nos hobennan awe. Door di sigui inverti den conocemento, innovacion y cooperacion internacional, nos ta construi un sistema educativo mas fuerte y un pais mas prepara pa e desafionan di futuro. Nos ambicion ta cla: mas oportunidad pa exito di estudio, mas conexion cu nos talento internacional y un educacion cu ta crece hunto cu e mundo. Pasobra ora nos hobennan crece, Aruba ta crece hunto cu nan”, Minister Croes a conclui.
