Gobierno ta bisa: inverti den Oranjestad. Revitalisa centro. Trece hende bek. Crea actividad economico. E inversionistanan local a kere e mensahe. Nan a cumpra propiedad, renoba edificio y pone nan propio capital riba mesa.
Pero awor cu nan kier p’e inversion produci, segun parlamentario Eduard Pieters (PPA), algun ta confronta un Gobierno cu no ta tuma e decisionnan necesario pa nan por opera adecuadamente. “Bo no por invita hende pa inverti, laga nan uza nan placa y despues laga nan na caya, pasobra Gobierno mes no ta cla”, Eduard Pieters a expresa.
E problema di Oranjestad no ta falta di inversion
Pieters anteriormente a pasa den centro di ciudad pa mustra dos imagen cu ta simbolisa e mesun problema. Na un banda, un edificio den decadencia. Y na otro banda, un edificio renoba cu capital priva, pero cu inversionista cu ta enfrenta limitacion, pa explota completamente nan propiedad.
Pa PPA, e contraste ta contundente. Oranjestad no ta falta hende dispuesto pa inverti. E ta falta decision di Gobierno. Y cada luna cu pasa, e capital ta keda para, ta perde oportunidad economico y e confiansa den gobierno ta sigui deteriora.
ROPV no por bira un excuus pa para desaroyo
Pieters ta conecta e problema directamente cu ROPV, vigente desde 2021. PPA ta sostene cu despues di varios aña, ta tempo pa revisa e planificacion espacial di Aruba. Entre otro, e partido kier mira aumento di densidad den centro di Oranjestad y San Nicolas y mas posibilidad pa construccion vertical. E motibo ta practico: Aruba su superficie no ta crece, pero nos poblacion y necesidad di vivienda si.
Un hoben cu termina estudio, un profesional cu kier forma famia y un emprendedo cu kier inverti, tambe mester tin espacio pa construi futuro na Aruba. P’esey Pieters ta cuestiona pakico gobierno ta papia di revitalisacion, pero ta tarda pa adapta e instrumentonan cu mester haci e revitalisacion posibel.
“Minister tin opcion. Pakico e no ta tuma decision?”
Pieters ta reta minister Geoffrey Wever y Rene Herde pa no warda mas aña riba un revision completo, si tin proyectonan cu por cuadra cu direccion cu gobierno mes ta bisa cu e kier bay. Segun Pieters, gobierno por analisa uzo di un ‘wijzigingsbesluit’, pa crea claridad pa e proyectonan eligibel, mientras ta prepara e cambio mas amplio di ROPV. Su punto politico ta simpel: Si gobierno ya sa kico e kier cambia mañan, pakico castiga e inversionista cu a kere den su palabra awe?
Revitalisacion no ta klinker ni slogan
Pa Pieters, revitalisa Oranjestad ta hopi mas cu djis drecha un 20 meter di caya, pone klinker of anuncia otro plan sin pia y cabes. Mester crea vivienda. Trece actividad economico den centro di ciudad. Duna siguridad huridico. Y mas ainda, cumpli cu inversionista cu Gobierno mes a invita pa forma parti di e cambio. Pasobra cada biaha cu Gobierno priminti pero no tuma accion of decision, e mensahe pa e proximo inversionista ta bira mas peligroso: “No inverti ainda, pasobra bo no sa si Gobierno lo cumpli cu su palabra.”
Y esey, segun Pieters, ta exactamente loke Oranjestad no por permiti. “Gobierno kier revitalisa Oranjestad? E inversionista ya a haci su parti. Awor ta turno di Gobierno pa haci su trabou: tuma decision y accion!”
