Prome Minister di Aruba, Mike Eman, a ricibi un buki di e tesis di doctorado di dr. Mónica K. Espinoza Cangahuala, kende a obtene su titulo di doctor den fisica (natuurkunde) na Rijksuniversiteit Groningen dia 22 di september 2026.
Mónica naci na Lima, Peru a crece na Aruba for di edad di cinco aña, a studia na Colegio Arubano y despues a sigui studia na facultad di ley na Universidad di Aruba, prome cu el a continua su estudionan na Groningen.
E ta e prome muhe den su famia cu a obtene un doctorado. Su investigacion ta enfoca riba con e moleculanan por organisa nan mes den e structuranan chikito pa captura y transporta luz, inspira pa e manera cu mata ta uza luz di solo durante fotosintesis.
E conocemento aki por contribui na desaroyo di material nobo pa uzo den futuro celsolar. Un aspecto special di su tesis ta cu e ta contene un resumen na Papiamento. Pa Mónica, ta importante pa nos lengua materno tambe haya su luga den mundo di ciencia y investigacion academico.
Actualmente, Mónica ta traha como Data Scientist na Hulanda y ta colabora cu Universidad di Aruba den un proyecto relaciona cu geospatial data science. E logro academico di Mónica ta un ehempel di e talento cu Aruba ta produci y di e contribucion cu profesionalnan cu a crece riba nos isla por aporta na desaroyo di ciencia internacional.
Na Den Haag recientemente Prome Minister Eman a felicita Mónica cu e titulo di doctor.
