Patrick Paskel, den un declaracion duna pafo di corte, a sigura cu momento cu e trece algo dilanti como periodista ta pasobra e ta sigur cu esaki t’asina. Ta p’esey 24ora.com tin e miho team di periodista cu ta haci investigacion y t’asina a logra yega na mas cu 180 mil siguido, pasobra ta para pa e ciudadano humilde y chikito cu no tin un bos.
Patrick Paskel y Nelson “Speed” Andrade tabata den corte dialuna merdia pa atende un caso cu Minister Rocco Tjon a cuminsa contra nan. A pidi rectificacion pa expresionnan haci den e programa Enfoke puntrando cu si e mandatario tabata un sospechoso of no.
Paskel na salida di corte a bisa cu e plataforma di 24.ora.com ta uno grandi, y a yega di haya nan mes un par di biaha caba den corte. “Si nunca bo no ta traha, bo no por haci fout. Nos ta e media mas grandi na Aruba, ta produci mas noticia cu tur otro, ta investiga, ta saca tur ultimo informacion y ta mantene gobierno skerpi.”
E periodista den su declaracion a bisa di ta consciente tambe cu nan (hunto cu Speed Andrade) no ta esunnan mas gusta cerca hopi hende. Y sigur un mandatario lo no gusta critica, pero di otro banda, nan tin miles y miles di persona cu ta sigui nan noticiero y 24ora.com. Nan ta sigur cu e hendenan aki ta gusta e forma con ta presenta e noticia, y esaki a pone cu a yega na 182 mil siguido.
“Nan ta confia den 24ora y nos ta confia den nos fuentenan. P’esey mi ta contento di por anuncia awe cu nos fuentenan tin rason. Ministerio Publico a duna nos rason awe den nos fuentenan.” El a admiti cu hopi hende lo bisa awo cu kisas a exagera e situacion, pero su contesta riba esaki e ora ta: “Nos a haci pregunta. Bo tabata sospechoso, bo tabata testigo of bo tabatey na Landsrecherche. El a bisa no. Mi no tabata sospechoso ni testigo nunca den e caso ey. Y nos a lesa esey tambe”.
Tambe a referi na un otro caso den cual Tjon tabata envolvi, cu esun di su yiu. Den e caso ey, a menciona Tjon como sospechoso. “A inform’e den un carta cu no ta persigui’e mas y cu ta seponeer e caso.” Pues esey ta palabranan hopi cla, Paskel a bisa.
A keda enfatisa cu no a acusa Tjon pero na diferente ocasion a haci un pregunta na e mandatario. Y na momento cu e mandatario a contesta, via di un comunicado y riba su Facebook, nan a lesa su contesta completo tambe. Mester mira tambe algo cu a hunga un rol importante pa nos den e caso aki cu tabata e carta cu procurador general a manda diabierna pa e team di defensa di Tjon. E tabata manera e clabo riba e caha di morto, pasobra ta confirma tur loke 24ora a haci pregunta riba dje, cu e tabata na Landsrecherche di mainta te atardi. Echo ta cu e caso na final a bay den doofpot.
Asina a bin haya sa cu e caso, e dossier, hasta a haya e nomber di Yuwana, cu tabatin un polis di fam Tromp cu tabata deteni, te ora cu diripiente a lag’e liber y e por a reanuda trabou. E caso nunca mas a bini dilanti. “Nos a haci pregunta pero nan a nenga. Awo PG si ta bisa cu e tabata un testigo.”
Na final e periodista a bisa cu e ta compronde y ta acepta cu no por tin libertinahe den prensa tampoco. Pero esaki no ta kita afo cu por haci preguntanan skerpi pa mira si ta haya contesta. “Awo a haya contesta di e minister, pero gañando mi, y riba dje, e kier bin corte pa pidi rectificacion.”
El a sigura cu e caso aki lo no tin influencia riba e forma di trece informacion pa pueblo. “Nos ta cu e pueblo. Nos no t’ey pa ningun minister ni un politico. Nos ta para pa e homber chikito.”
