Boto La Pandilla ta esun cu a bay zuid den weekend cu algun persona pa forma parti di un actividad. Dialuna atardi Wardacosta di Corsou a saca nan e helicopter, mientras cu Aruba a despacha helicopter di polis. Tambe Wardacosta a saca nan boto pa bay busca e boto aki cu tin abordo seis pa ocho persona.
For di fuente fidedigno ya caba nos redaccion a haya informacion cu tabata trata di e boto La Pandilla. E boto ya caba tabatin un motor cu problema na momento a bay Venezuela.
La Pandilla tabata e prome boto cu a sali direccion Aruba. Riba ruta pa Aruba, otro tres boto a pasa nan y a mira cu tur cos tabata bayendo bon. Pero, diripiente e boto no por a sigui rumbo Aruba. Nan a haya mas problema cu e motor y e pata a kibra cu nan.
Prome cu 8:00 pm a haya informacion cu e boto ta mara na Punta La Macolla, Venezuela. Tur persona abordo di e boto. Nan no por a comunica cu ningun persona, pasobra no tabatin manera pa tuma contacto cu ningun hende.
