Ken den su bida,no a yega di pasa den momentonan dificil, abo a yega di wordo engaña of traiciona, hende a pone trampa pa bo, bo yega di stima y caba hende a probecha di bo, bo a yega di cay cera pa motibo di amigo, bo a yega di confia hende y caba nan a plama bo asunto tur caminda, hende a yega di gaña riba bo, bo matrimonio a kibra, a abusa di bo yiu of asesina, bo esposo of esposa a muri den accidente, bo a yega di perde bo trabao door di mentira of maldad di hende. Tur esaki ta temanan cu ta haci dolor. Y nan ta pasa cu tur hende den tur organisacion y rond mundo.
Pero awe mainta nos kier duna bo un conseho, pa bo pidi Dios yuda bo pa bo laga los di e cosnan aki cu por afecta bo bida grandemente, pasobra pa Satanas ta un placer pa cada rato ripiti bo pasado pa asina e mantene bo den su gara.
Mayor, amigo, amiga, ruman, hoben, bo no ta gana nada cu un bida di vengansa y cu cada bes bo tin cu discuti riba cosnan cu a pasa hopi tempo pasa, bo mester crece den Fe y curashi pa asina bo bay dilanti.
Awendia tin hopi hoben ta kibra curason di otro. P’esey e palabra di Dios ta bisa pa nos libra nos mes di fornicacion. Antes un mucha homber ta drumi cu un mucha muhe sea e ta virgen of no y ta bay lag’e sea cu yiu of no. Awor aki tambe e a bira cu tin mucha muhe ta kibra curason di mucha homber y ta bay lag’e, despues di a drumi cu ne pasobra tin hopi hoben ta kere cu si un hende drumi cu bo e ta stima bo.
Hoben, no laga ningun hende gaña bo no ta tur hende cu kier drumi cu bo of a drumi cu bo ta stima bo, tin hopi ta probechado, abusado, nan kier tin bo riba nan lista di muhe of homber cu nan a purba, pero di amor no tin nada.
Pa evita dolor, berguensa, depresion, stress, rabia, bo mester cuida bo mes y tende di bo mayornan y mayornan bira mas responsabel pa boso yiunan y guia nan den caminda di Dios.
Tin hopi hende den adiccion pa motibo di duele di locual a pasa nan den bida, nan ta pasa hopi rehab, pero si nan no haya liberacion di locual a pasa cu nan. E chens ta grandi cu nan por cay bek den adiccion, pasobra e enemigo no ta laga bay facil, si e presencia di Dios no resalta riba e duele y depresion.
Prome cos cu ta recomenda na un hende den depresion ta un psicologo of dokter di cas.
Hopi biaha nos ta confronta e situacion cu e hende kier tur cos pero e no kier Dios. Asina bo invita e persona pa bay Iglesia, misa, tempel of miho bisa cas di Dios, e ta nenga y eynan bo ta conoce e presencia di diabel of remordimento di pasado of mal experiencia cu nunca a pordona.
Den Mateo 11 vers 28 Señor ta bisa bin cerca mi tur cu ta cansa y carga y lo mi duna bo sosiego. Esey ta nifica cu segun bo ta Cu mi lo mi yuda bo y kita tur carga y mal pensamento cu ta den bo bida, mescos cu bo a tuma tempo pa cay den depresion. Awor duna Señor e tempo pa libera bo for di gara di e enemigo.
Hesus no ta cobra, tampoco lo tira nada na bo cara, pero un cos ta sigur lo bo keda liber.
Hesus lo no saca bo cuenta riba caya, pero e ta e solucion permanente pa tur esunnan cu ta cansa y carga .
E miho conseho cu nos por duna bo ta pa no worry cu ningun hende pero habri bo bida pa Señor Hesus Cristo y tur cos lo bay bo bon.
