Diadomingo anochi pa 11:00 pm a sosode un accidente na altura di e rotonde di Alhambra Casino riba J.E. Yrausquin Boulevard. Un auto marca Suzuki, modelo Swift, color blauw y cu number A-18000 a ranca un palo di luz por completo banda di caminda.
E chauffeur, un señora, a conta polis cu e tabata rumbo pa hospital pa ricibi tratamento medico, ora cu diripiente el a bira malo tras di stuur y tabata sinti cu e lo haya un ataca di epilepsia. Den e proceso el a bay haci un movecion den auto y e stuur a bira. Prome cu e kier a realisa, ya el a dal den e pal’i luz caba.
Polis a presenta na e sitio pa atende cu e accidente. E yiu homber a keda di hiba su mama hospital pa un chekeo medico, relaciona cu e enfermedad cu e tin y pa e hecho cu el a dal cu e auto. E auto ta sigura, pues seguro lo cubri e pal’i luz awo.
