Tur luna Hospital ta saca su empleado di luna y e luna aki a termina aña 2018 cu Pascale Ustar, diabetes verpleegkundige na poli Interne Geneeskunde.
Empleadonan di Poli Interne Geneeskunde a reuni hunto pa asina sorprende nan colega Pascale Ustar como e empleado di luna. Pa Pascale Ustar esaki tabata un sorpresa grandi. E ta contento di ta e prome persona nomina na su departamento y ta spera cu den futuro lo toca turno na otro.
Dr. Majida Zidane, internista, a duna di conoce cu tin hopi hende diabetico y nan ta yega na tanto hospital como e clinica. E trabou cu Pascale ta haci ta hopi importante y e ta haci e trabou increiblemente bon.
Pascale ta merece e reconocemento aki pa e cantidad di trabou duro cu e ta haci tur dia cu e meta pa optimalisa e cuido pa tur pashent diabetico. E ta haci esaki cu yen di entusiasmo y cu hopi pasenshi. Ademas, e tin conocemento profundo riba e tereno aki y ta keda na altura di tur e desaroyonan pa loke ta e malesa diabetes. E ta eherce e trabou di 3 persona pareu sin molestia otro colega, sea na e policlinica of riba piso. Esey ta algo di admira sigur.
Pascale ta wordo aprecia door di hopi colega y pashent. E ta yuda unda cu e por y ta comparti su conocemento y ta habri pa iniciativanan nobo. Banda di esaki e ta bin cu ideanan pa mehora e cuido demostrando asina un pasion grandi pa su trabou.
Un pabien grandi ta bay na Pascale Ustar pa e reconocemento aki. Sigui asina!
