“Nos ta hopi contento cu Geoffrey Wever a dicidi di uni su mes na plataforma RAIZ y kier acompaña nos den eleccion 2021, asina lider di Partido RAIZ,” Ursell Arends, a declara. “Geoffrey Wever ta un di e persona nan cu a forma parti di e grupo di persona cu kier a trece cambio pa Aruba na 2017 y a yuda nos funda Partido RAIZ na 2017 y tambe a contribui na yuda nos formula varios punto cu plataforma RAIZ a trece pa pueblo durante eleccion 2017. Nos ta honra cu Geoffrey a dicidi di subi lista di plataforma RAIZ y mi ta sigur cu e lo contrui grandemente na RAIZ y politica di Aruba,” asina e lider di plataforma RAIZ, Ursell Arends a declara.
Geoffrey Wever ta tata di dos yui, Sadie di 7 aña y Isaac di 5 aña. Como yiu di Chinto Wever y Ingrid Wever-Croes, originalmente di bario nan di Brazil y Savaneta, Geoffrey a lanta den bario di Tamarijn, na Paradera. Geoffrey tin un ruman muher yama Kimberley Wever. Despues di a studia notarieel recht y belastingrecht na VU, Amsterdam, Geoffrey a traha e ultimo 15 aña nan como abogado y consehero di belasting. E ultimo 7 aña nan Geoffrey a duna les part-time na Universidad di Aruba, na e Facultad Economico Financiero y na e Facultad Huridico.
“Semper mi tawata kier a duna un contribucion na Aruba,” Geoffrey a cuminsa ta bisa, “pero desde cu mi mes a bira tata di dos yui e sentimento aki a bira mas fuerte y mirando cu Aruba ta para dilanti reto nan importante, mi a dicidi pa e eleccion aki participa como candidato pa mi tambe por duna un contribucion activo na Aruba. Mi ta alinea cu e vision di plataforma RAIZ. Mi ta haya cu cada candidato tin pasion pa Aruba y kier contribui.”
“E ultimo 15 aña nan, mi a traha cu hopi placer pa sector commercial di Aruba, pero awor mi kier dedica mi energia y passion y locual mi a siña di sector commercial, na e bienestar general di Aruba. Mi ta convenci cu Aruba tin un potencial grandi y cu tin hopi espacio pa mehoracion riba varios tereno. Geoffrey a continua ta bisa, “Ami personalmente kier enfoka riba economia, impuesto y mehora nos sistema legal pa combati tur forma di corupcion.”
Banda di esaki Geoffrey a continua ta bisa : “Mi ta kere nos por incentiva nos economia y crea cupo nan di trabou y desaroyo dor di introduci incentivo nan fiscal y laboral. Actitud di Gobierno ta essential pa duna comercio e espacio pa nan por inverti y crea crecemento economico y pa esey mi ta kere cu Gobierno mester ta mas pro activo y yuda comercio. Mi ta kere cu ta hopi necesario pa sera tur e buraco nan cu nos sistema huridico ainda tin pa asina trata na elimina tur posibilidad pa politico nan enrikece nan mes. Como parti di un generacion di politico nobo nos tin e obligacion pa eleva nos pais, y mi ta convenci cu e ta posibel.”
“Dentro di poco mi lo cuminsa presenta idea nan concreto pa asina e pueblo votador compronde cu no ta palabra bunita sin contenido pero palabra cu por wordo converti den realidad. Mi ta hopi enthousiasma pa hunto cu plataforma RAIZ cuminsa traha pa Aruba.” Geoffrey a termina ta bisa.
