Den e dianan aki tin varios encuentro publico ta tumando luga pa trata varios tema den Parlamento. Miembro di fraccion di MAS, Aquannette Gunn a comenta cu diaranson a cuminsa cu e tratamento di ley pa loke ta e plan di impuesto 2023.
Fraccion di MAS a elabora mas tanto riba e gruponan mas vulnerabel den nos sociedad, principalmente e pensionadonan.
E pensionadonan cu den varios reunion anterior, e ministernan a duna di conoce cu nos conoce un crecemento pa loke t’e aña venidero.
Entre otro aumento di pensioen y tambe aumento di salario minimo.
Aunke tin di bisa cu practicamente si mira tur esunnan cu tur luna ta ricibi un salario minimo, no lo conoce ningun alivio of e palabra magico cu e palabra ta uza, un compensacion p’asina nan por mitiga e aumento substancial cu lo bay tin den nos comunidad.
Tambe tin cu ratifica e fraccion di MAS, nan no a sostene e concepto di ley aki pasobra e concepto di ley lo ta bay ta devastador. E lo bay tin efecto negativo, no solamente p’e forsa di compra di nos comunidad, pero tambe e lo bay tin un efecto negativo pa loke t’e clima di inversion y tambe lo bay tin un aumento substancial di 32% pa loke ta impuesto di turismo.
Fuera di esey tabatin un minister di finansa cu ta bisa pa tuma decision asina, mester ta un persona di caracter fuerte, esta no por ta blachi, pero mester por ta troncon. Pero e berdadero troncon ta, cu entrante prome di januari, ora cada un ciudadano bay trompica riba tur locual cu nan lo tin cu bay pasa den dje, kier of no. Pasobra manera cu esunnan cu ainda despues di mey anochi a sigui e reunion publico aki, por a tuma nota cu esaki a keda aproba pa 11 parlamentario cu ta sostene gobierno y di parti di oposicion, cu tabata seis y no a aproba dicho ley.
Parlamentario Gunn ta pidi pueblo pa keda hopi pendiente y pa ta prudente tocante di esaki, pasobra durante henter e mainta, henter e merdia y anochi nan tabata vocifera y purba bende cu “esunnan di schouder smal lo carga menos peso y esun di schouder hancho lo carga mas peso.”
