E aña aki, despues di dos aña di festival virtual, Festival di Dande Infantil y Hubenil ta bek den su formato original: cu publico presente.
Aaron Arenas, organisado festivalnan folclorico infantil y hubenil, comision organisado di Festival di Dande Infantil y Hubenil e aña aki un biaha mas lo tuma luga na Centro di Bario Tanki Lender, riba diasabra 28 di december proximo. E festival ta programa pa cuminsa 7:00pm te cu 12:00am.
INSCRIPCION
Pa dos siman largo, por a inscribi di manera virtual y esaki a sa di haya un acogida grandi cerca e cantantenan. Un total di 25 dande a inscribi, den loke ta categoria infantil y hubenil, como tambe seis agrupacion musical.
Den e nombernan cu a inscribi, por a nota cu tabata tin algun nomber ya conoci, cu lo bin bek pa retene nan titulo, pero tambe varios nomber tambe lo t’ey pa prome biaha den e festival.
Centro di Bario Tanki Lender lo ta sede di e Festival di Dande Infantil y Hubenil, n’e parti pafo. Bar y cushina lo ta bon surti. Lo tin tambe varios tent cu lo bende cos dushi, cuminda crioyo, artesania local.
Den cada categoria lo tin cinco participante. Den categoria di 13 – 17 aña lo tin nuebe participante. Y lo saca e ganado, e prome y segundo luga. Y pa e categoria di 13 – 17 aña, lo saca e ganado, prome, segundo, tercer y di cuater luga.
Tambe Arenas a enfatisa cu den cada categoria lo saca Rey of Reina, pues no Rey y Reina.
E comision ta contento di por bisa c’un participacion di 25 dande, ademas di cu tin hopi actividadnan pasando, manera e Festival di Caiso & Soca cu a tuma hopi tempo di parti di e compositor- y areglistanan, como tambe e trainingnan.
Actualmente t’e muchanan cu ta den ensayo y e comision ta gradici e lidernan di banda, e bandanan, e mayornan, tur esunnan cu ta apoya e muchanan. Pero mas cu tur, e mesun cantantenan, ya cu sin nan, lo no tin festival. Ta nan, e participantenan ta esunnan cu ta haci e festival grandi.
E comision organisado lo trece innovacion den e festival, unda cu e huradonan lo haci uzo di un sistema digital p’asina nan por haci nan trabou di un manera mas eficiente y di e manera aki tambe, ta cuida nos medio ambiente.
Pa e festival aki, no a ricibi niun inscripcion pa loke ta tipico/propio composicion. Asina ta, e festival aki lo ta uno dedica completamente na Dande.
Por ultimo 24ora.com a keda pendiente p’e secuencia difinitvo di e festival pero te cu publicacion di e articulo aki, esaki no a keda suministra pa e organisadonan.
