Nos kier a anuncia na pueblo di Aruba cu 8 di maart ultimo, Aruba a haya un organisacion politico nobo. Directiva di partido ta comunica esaki na e pueblo di Aruba cu e meta nos por logra converti nos mes den un speransa pa e grupo grandi di Aruba cu a perde confiansa den politica. Nos ta desea di crea un politica di nivel unda e enfoke ta ariba solucion y con nos ta crea e oportunidadnan hunto cu y pa Aruba.
Durante e ultimo periodo di e gobernacion, miembronan fundadado a nota cu e ciudadano su poder di compra a bay atras, e situacion economico financiero ta uno deplorabel.Tin un pobresa nobo cu ta reina meymey di nos pueblo. Ademas derechonan social di cada ciudadano y/of empleadonan cada biaha ta keda oprimi, procesonan democratico cu tin cu sigura cu pueblo no ta perde confiansa den su gobernantenan a keda mina, asina creando precedentenan nobo cu ta peligroso pa nos estado di democracia. Nos salubridad, enseñansa, medio Ambiente, husticia, careteranan tur a bay atras, nos ta core rond di Aruba y nota cu tin falta di perspectiva pa un vision solido cu por crea e solucionan cu nos pais tin mester y su ciudadania tanto ta anhela.
Nos kier ta un alternativa pa empodera cada ciudadano di pais di Aruba. Nos ta mas cu un partido politico, nos ta kere cu basa riba nos statutonan nos tin un obligacion y responsabilidad cu Aruba. Nos ta un forum politico, un espacio unda cada ciudadano di pais Aruba por forma parti di un dialogo. Nos kier stimula un dialogo pa por crea participacion bek den politica y conecta e grupo cu ya pa hopi tempo ta sinti cu politica no tin un valor agrega den nan bida. Nos ta kere cu abo tin un contribucion grandi na e progreso di pais Aruba y nos kier brinda bo e forum pa bo por forma parti di e dialogo, forma parti di un politica moderno y inovativo.
Ken nos ta?
Partido Direccion Politiea ta un partido cu e ideologia sociaal-liberal progresivo unda nos ta kere firmemente den yuda stimula mas participacion di pueblo di e forum democratico, esta parlamento y gobierno di Aruba mediante nos organisacion politico. Nos kier crea un espacio pa empodera miembronan di partido y tur ciudadano di pais Aruba.
Como un partido sociaal-liberal progresivo nos ta haya e ta crucial pa inverti den e hende, pa crea un prosperidad cu ta wordo reparti husto unda tur hende ta haya e mesun oportunidad pa por alcansa nan meta- y soñonan. Semper teniendo cuenta cu nos mama tera y e consecuencianan ecologico.
Nos ta kere cu Aruba merece un gobierno cu ta traha pa e interes general, nos kier mira Aruba su siguiente gobierno enfocando mas riba e hende, paso nos ta wak abo y como ciudadano nos sa con importante abo ta. Y p’esey nos kier traha duro hunto cu Aruba por duna contenido na e vision comun cu nos tur tin: Progreso pa Aruba
Kico ta nos vision & mision?
Nos vision:
- Logra un gobierno confiabel y integro mediante cultivacion di un sociedad unda progreso y oportunidadnan ta alcansa cada ciudadano di pais Aruba.
Nos mision
- Nos kier crea solucionan basa riba obhectividad y profesionalismo cu lo mester percura pa tin un balansa entre e desaroyo economico, oportunidadnan laboral, stabilidad financiero di cada ciudadano y e desaroyo ecologico di aruba.
Nos organisacion ta wordo guia door di e siguiente Normanan y balor:
Integridad, igualdad, empatia, responsabilisacion, fraternidad sociaal ecologisco, libertad, etica, stabilidad, siguridad, inclusion, diversidad, empoderacion, rasonabilidad y equitad.
Kico ta politiea?
Nos base fundamental ta deriva for di e pensamento pa haci di Aruba un Politiea, esaki kermen crea un gobierno cu ta traha segun e prinicipionan democratico pa e interes comun y general. Nos ta spera di por yama bonbini na mas Politieanonan cu ta desea di forma parti di nos organisacion como miembro.
Nos ta haci un yamada na Aruba pa keda pendiente, pronto mas informacion lo wordo comparti cu Aruba y esunan interesa den bira miembro di e Forum Politico Alternativo di Aruba.
Aruba nos ta kere cu esaki ta nos momento pa duna nos contribucion, pa hunto nos por duna contenido na e vision cu nos tin den comun: Progreso pa Aruba!
