Hulanda ta un paraiso fiscal, segun Parlamento Europeo. Mescos cu Luxemburg, Malta, Irlanda y Cyprus, Hulanda a subi e “blacklist” di paisnan cu ta fiscalmente kiboca. Parlamento a vota na Straatsburg den un mocion di Paul Tang (PvdA) pa clasifica e 5 paisnan di Union Europeo como paraiso fiscal. Esaki ta un declaracion historico y e señal mas cla posibel cu Hulanda mester kibra cu pasado,” segun Tang.
Debi na e planificacion fiscal agresivo di parti di Hulanda, otro paisnan di Union Europeo ta perdiendo 11,2 Biyon Euro na entradanan fiscal. Esaki ta afirma den un informe aproba diamars pa e Parlamento Europeo.
Union Europeo tin un “blacklist” pa paraisonan fiscal, pero ta trata solamente di paisnan pafo di Union Europeo. Tin 15 pais of region, incluyendo Aruba, Barbados y Bermuda. Tang: “Esey mester cambia. Hulanda y e otro cuater miembronan di Union Europeo ta den e parti superior di e lista y ta ora pa nos reconoce esey.”
Parlamento a acepta un informe di un comite special cu a investiga e delitonan financiero y evasion di impuesto aña pasa. Pa aña, Union Europeo lo a perde mas di 900 biyon di Euro pa sociedad door di evacuacion fiscal y fraude. Segun e informe, ta esencial un cooperacion mas estrecho entre e paisnan y un miho deteccion. Parlamento kier pa revisa e “vetorecht” den casonan di fiscal. Awo un pais miembro por blokia e regulacion sin fin.
Parlamento tambe a pidi abolicion di “visanan di oro” cu algun pais miembro ta ofrece e stranheronan a cambio di ton y tin biaha miyones. Debi na e falta di transparencia riba e origen di e sumanan aki, placa por wordo laba na e manera aki.
E yamada pa e paisnan di Union Europeo sigui cu e lucha contra e evasion fiscal no ta nobo. Investigadonan di e Universidad di Amsterdam a pidi pa esaki na fin di 2017, por ehempel, despues di a establece cu Hulanda tabata e centro mas importante den e evasion fiscal internacional. Di acuerdo cu investigadonan, di tur e placa cu ta yega na e paraisonan fiscal, rond di 23 porciento ta pasa via Hulanda.
Despues, e investigadonan a argumenta cu e distincion entre puertonan di transito, manera Hulanda y e paraisonan fiscal tradicional manera Barbados y Bermuda por ehempel, ta crucial. “Kisas lo ta miho aborda e puertonan di transito. E paraisonan fiscal nobo cu tasanan abao ta apareciendo constantemente. E condicionnan ideal pa e puertonan di transito fiscal ta: cantidad di tratadonan fiscal, un solo estado di derecho, bon reputacion, solamente ta presente den algun pais.”
