Stichting BOB Aruba a tene un conferencia di prensa riba cierto informacionnan importante. Dianta Nuesch, relacionista Publico di Stichting Bob, a splica cu fuera di introduci su mes, a duna un relato tocante di e programa di checkeo pa cancer di pecho y con esaki ta bayendo te cu awor aki.
Den e funcion, Nuesch su obhetivo ta pa concientisa e pueblo di Aruba tocante e importancia di e programa cu Stichting BOB Aruba ta dunando y ofreciendo e hende muhernan.
Un mamografia na tempo por salba bo bida. E frase aki di biaha caba ta mustra y bisa con importante e sondeo ta. E meta ta pa detecta y iregularidadnan presente den e pecho mas pronto posibel den e hende muhenan sano di 45 pa 75 aña di edad. Asina por aumenta e chens di bida mas largo y miho calidad di bida, despues di un tratamento contra cancer.
E programa di chekeo di populacion ta boluntario. Y cada hende muhe entre 45 y 75 aña ta wordo invita pa stichting Bob mes, cu un carta, un fecha y un orario caba riba dje.
Actualmente, Stichting BOB ta invitando e hende muhernan pa bin dos biaha caba pa haci mamografia cerca nan.
A cuminsa na 2016 cu e prome buelta di invitacion. Awor aki, na 2018 a caba di finalisa e di dos buelta di invitacion cu carta. Pa aña ta invita 12 mil hende muhe pa bin haci nan mamografia cerca Stichting BOB Aruba.
Cada dos aña e cliente lo haya un invitacion nobo. Den e prome buelta, a manda 24.817 invitacion. Di esaki a haya 9751 hende muhe cu a acudi pa e sondeo. Esey ta un porcentahe di 39 porciento. Hopi importante ta pa menciona cu ta wak un adelanto den participacion di e hendenan. E aña aki, e di dos invitacion, ya ta mustra cu 42% a acudi.
Pa sigui subi e participacion durante di e aña aki ta bay haci mas actividad. Esaki lo ta mas structura cu e contactonan cu medionan di comunicacion. Ta traha mas cu empresa, hotel, institucionnan, tur cu e enfoke di salud di publico pa asina yega mas cerca di Aruba su hendenan.
Riba e agenda di e aña aki a cuminsa cu e Care Program na Superfood pa haya fondo cu ta sumamente importante pa e mantencion di e mamogramnan y tambe pa tin den banda pa un siguiente mamogram. Lo bay organisa fundraisings y caminata den e aña aki. Lo organisa hopi charla den e centronan di bario. Lo haci workshop di saminacion tambe pa asina por traha mas pa concientisa e pueblo di Aruba con importante e mamografianan ta.
Hopi importante ainda pa menciona ta cu e sondeo aki ta wordo cubri pa AZV y ta gratis pa e hende muhernan cu ta wordo invita.
Un yamada ta bay pa tur e hende muhenan, cu si nan tin cualkier pregunta of no a haya invitacion ainda, tuma contacto cu Stichting BOB Aruba, via 5881212. Tambe por Whatsapp of manda un mensahe via Facebook. E number di Whatsapp ta 5945020.
