Awe merdia Polis a detene e chauffeur cu posiblemente a causa e desgracia fatal na Ponton/Tanki Flip. Desde cu e accidente a sosode y despues di fayecimento di Ana Quandus-Gavidia, naci dia 11 di augustus 1936 (82 aña) na hospital, autoridad no a sosega riba e caso. Tabata dificil pa a yega na e chauffeur cu a ocasiona e accidente. Polisnan di trafico a traha den un forma incansabel riba e caso pa finalmente yega na e chauffeur of tambe e auto cu a causa e desgracia fatal aki.
E auto aki den oranan di anochi, tabata un Nissan Tiida, RHD, coriendo riba e caminda di Ponton pa Tanki Flip, yegando e rotonde, a atropeya Ana Quandus y bay lag’e benta abao.
E victima ta biba eybanda mes. Su yiu homber a bin hay’e benta abao y e tabatin sla serio na cabes entre otro. Ambulance a yega, tabata despues di carnaval y a bay cun’e mesora pa hospital.
E chauffeur no a para y su tras dos auto mas tambe a pasa sin para pa baha yuda e peaton benta riba caminda. A busca grabacion di e negoshi cu tin dilanti. Eynan a haya e prome indicacion di ki tipo di auto mas of menos esaki tabata.
A base di insistencia di e departamento di trafico di Polis, a cana un caminda largo. A sigui e auto aki tur caminda cu el a bay. A base di nan experiencia investigativo, a logra yega tur caminda. Hasta na e garashi caminda cu a hiba e auto pa drecha, unda el a cumpra e piesanan, cua ta e ruta cu e auto a core. Tur esaki ta un proceso largo cu a tuma su tempo, pero finalmente a yega pa cuminsa na e auto cu ta e Nissan Tiida aki, color di oro y tambe a yega na un dama Venezolano, casa recientemente na Aruba, trahando den un bar den un negoshi na Playa.
Awe merdia tabata asina leu cu a haya aprobacion di Minsterio Publico pa para e auto y detene e chauffeur. A busk’e henter dia y finalmente a dun’e instruccion p’e para y tabata net p’abao di Cas di Partido AVP, p’ariba di DIMAS. Ey a logra par’e. A baha e chauffeur, a cuminsa papia cun’e, mustr’e riba su derecho.
E sospechoso awor lo mester responde pa su acto, no solamente di a causa un accidente, sino cu den forma delibera a purba sconde y no responsabilisa pa e dolor cu el a bay laga famia atras cune.
