“‘Manure’! Un substancia generalmente indesea cu tur pais mester deal cu ne. Si no haci esaki na un manera responsabel e por tin consecuencia negativo pa nos salud, medio ambiente y economia. Awa di riolering, Riool WaterzuiveringsInstallatie (RWZI) ta un problema na Aruba. Di otro banda nos ta mira cu tin scarsedad di awa pa agricultura, cual ta un otro problema na Aruba. Dos problema serio, mientras ambos por ta un solucion pa e otro, uzando un bon sistema di filtracion,” esaki ta loke e parlamentario Alvin Molina, di e fraccion di MEP, a bisa. E ta un atake formal contra Minister Ursell Arends.
Ken ta responsabel pa busca un solucion pa e problema aki? Segun ley (LandsverordeingInstelling Ministers ) ta e Minister di Naturalesa tin esaki den su cartera. E mesun minister ta responsabel pa proteccion di naturalesa y promocion di agricultura. Un combinacion di topico cu e minister mes a boga p’e durante formacion di gobierno. “Awe, dos aña y mey den gobernacion, nos ta tende cu nos Minister di Naturalesa a tira e serbete den ring y kier pasa awa di riool den man di Minister di Energia. Ta di lamenta cu esaki a bira necesario, mientras cu por a siña di e profesionalnan local y internacional con pa uza e awa segunda mano na bienestar di e agricultor.”
E ta finalisa bisando cu pa pueblo no ta haci un diferencia cua minister ta encarga pa deal cu awa di riolering. A bira tempo si pa e minister presenta un plan aceptabel of laga otro hacie, no ta momento pa hunga tref. ‘Get your manure together’!”
