“Buscando informacion pa mi por compronde miho kico ta bayendo fout den Directie Infrastructuur en Planning (DIP), mi a reuni cu Errol Sjak-Shie, cu tabata director di DIP entre aña 2005 pa 2012 y consehero di team di maneho entre aña 2018 pa 2021. El a splica mi algun punto di e departamento y tambe a comparti ideanan con lo por soluciona e problemanan”, asina Alvin Molina, miembro di parlamento di Aruba pa fraccion di MEP, a duna di conoce.
“Pa cuminsa, Errol Sjak-Shie a informa mi cu e personeelsbeleid mester haya atencion. Sin suficiente personal bon prepara y capacita pa eherce e trabou, ta dificil pa duna un bon servicio na pueblo. Hunto cu un sistema actualisa up to date, e personal ta percura pa trata e
peticionnan na un manera honesto, pa e atraso wordo elimina y asina ta evita corupcion”, segun Alvin Molina.
Na e momento aki, tin mas cu 1000 tereno bashi cu no ta uza. Supervision y control lo mester haci e trabou necesario pa por otorga e terenonan aki na ciudadanonan cu si lo haci bon uzo di e tereno. Prome cu honra un peticion oficialmente, mester presenta un “bouwplan” y
prueba di financiamento pa traha e cas, esaki pa evita cu un tereno keda bashi.
Maneho di DIP mester demostra un liderazgo cu ta promove e trabou di e trahadonan y eherce “management skills” pa su hendenan por duna un servicio optimal. Errol Sjak-Shie a enfatisa e importancia pa haci uzo di un “economic developer” pa por yega na un desaroyo economico, infrastructural y social balansa y optimal. “Mi mes a entrega un mocion riba e topico aki un aña y mey pasa pa cu e desaroyo pariba di brug. E mocion a ricibi sosten unanimamente di Parlamento di Aruba. Lastimamente, no a mira accion ainda di parti di gobierno. Mi lo sigui evalua e desaroyonan riba e topico aki”, segun Parlamentario Alvin Molina.
