E pareha Francisco Mendoza (Venezolano) y Maureen Heggie (Chilena) tur aña ta goza e
conciertonan di Aruba Symphony Festival (ASF) na Cas di Cultura caminda Don Francisco no tin problema pa drenta riba su rolstoel.
Don Francisco y Doña Maureen ta biba na Aruba desde 2014, y dia cu nan a tende cu e Festival mester di ayudo financiero, nan a deposita e suma di Afl. 5,000.00 na cuenta di e Festival. Directiva di e Festival mesora a nombra nan “Gold Partner” y diasabra pasa Clyde Harms, Presidente Honorario di e Festival y su esposa Milagro (Venezolana) a bay gradici nan personalmente pa nan donacion.
E potret adhunto ta mustra Clyde ta entrega cuater tikete VIP Access como muestra di gradicimento. Don Francisco y Doña Maureen tin un amor grandi pa Aruba pa e forma cu nan a wordo ricibi aki, y nan ta bisa cu nan contribucion na e Festival ta un manera di mustra nan gratitud. Nan ta sinti cu e Festival ta masha importante pa e desaroyo cultural, educativo y social di Aruba. Aruba Symphonic Festival ta spera cu otronan lo sigui ehempel di e pareha Mendoza – Heggie y aporta na e festival. Naturalmente, cada uno segun su capacidad financiero. Tin varios manera cu por aporta: Cu un deposito na Aruba Bank cuenta bancario Nuevo Mundo Foundation, number 601108190 ; cumpra tikete VIP Access, of por lo menos, asisti na e conciertonan caminda ta cobra solamente pa e concierto inaugural (07/17) y esun di gala pa cera e festival (07/27).
Tiketena VIP Access y esnan pa entrada na un concierto ta obtenibel na Cas di Cultura, na tur bookstore, na e tiendanan di Aruba Vision Center, y cerca e miembronan di directive di e Festival: Alberto Peret-Gentil ([email protected]), Johnny Croes ([email protected]), Clyde Harms ([email protected]) y Orietta Mansur ([email protected]). Tikete di entrada ta costa solamente 35 florin pa adulto, 20 florin pa mucha te cu 18 aña. Tiketenan VIP Access ta bal 200 florin y nan ta valido pa entrada y asiento VIP na tur concierto, sea na Cas di Cultura, Ritz-Carlton, Paseo Herencia, Casibari Café of abordo di Freewinds. Aruba Symphonic Festival ta cuminsa dia 17 y ta dura te 27 di juli. Manera e otro añanan, e programa ta hopi varia, y lo tin musiconan mundialmente renombra di mas cu 10 pais. Tambe lo tin un presentacion di e lectura Art of Possibility di Dr. Benjamin Zander, fundador di e Boston Philharmonic Orchestra, y ta miembro di e conseho di asesornan internacional di Aruba
Symphonic Festival. Bishita www.arubasymphonyfestival.com pa mira e programa completo di concierto y haci conoci cu tur e musiconan cu lo participa.
