X-Treme Bike Parade ta un Parada di Bais cu ta wordo organisa pa e banda Youth X-Treme (YX3M) pa hopi aña. A cuminsa cu e Parada di Bais na 2006 cu un grupo chikito di 50 persona y un ruta cortico cu a sali y termina na Postkantoor Playa.
Despues e parada a cuminsa bira mas grandi y e ruta tambe a bira mas largo. Tabata sali for di La Granja Savaneta y termina na edificio bieu di DOW, cu un cantidad di 350 bais riba caminda. E tabata algo placentero pa e mucha- y hobennan cu ta core pasa riba caminda cu animacion musical di YX3M. Grupo di scolnan tabata participa pa asina por haya chens di gana un toca gratis na nan scol y tambe tabatin premio individual pa e bais mas creativo dorna.
Na 2015 cu tabata e ultimo aña cu e Bike Parade a tuma luga, a haci un parada diferente cu tabata un Lighting Bike Parade. Esaki a sali y termina na Do it Center y sigur un di esnan mas exitoso.
Algun aña cu YX3M no tabata den paradanan di carnaval, a bira dificil pa organisa e Bike Parade debi cu no tabatin sound y trailer. E aña aki si ta e caso, y a plania pa Bike Parade ta bek riba caminda y lo a tuma luga diadomingo 2 di februari. Kier a mantene e prijs abou cu ta Afl 15 inclui t-shirt y consumo, pero lastimamente no a logra haya sponsor pa por cumpli cu esaki. Pa e motibo aki cu hopi duele, management team di YX3M a dicidi na cancela e Bike Parade e aña’ki. Ta pidi disculpa na esnan cu a anhela di por a participa e aña aki, y ta spera cu pa otro aña e Bike Parade por continua.
