Diamars mainta ta habri cu presencia di polis un biaha mas na Paradera na cas di Esteban “Dichi” Lacle. E biaha aki Dichi ta decidido y a duna ultimatum di awe diamars atardi pa 2:00PM pa busca tur e cachonan of ta habri porta di haula y laga tur cacho los.
Situacion ta escalando cu e cachonan di persona conoci como “Kiki”. E señora aki den luna di october a laga algun cacho atras cerca Dichi. Mirando cu Dichi ta un persona cu ta gusta cacho y kier a duna un man, el a duna alohamento na e cachonan aki mientras Kiki lo a busca luga pa nan. Ta papiando awo di 15 cacho, mayoria cacho di caya y entre nan 2 cu ta di rasa.
Dichi a tuma contacto na varios ocacion cu e persona aki pa e bin busca su cachonan pasobra problema familiar y cu bisiñanan ta birando dia pa dia mas grandi. Cachonan ta haci desordo inmenso/insoportable y mas ainda cu e intencion na ningun momento tabata di haya nan cu mas di 15 cacho na cas.
Dichi ta conta cu e ta cuida cacho na cas di su ruman, cu ta brinda e espacio, pero cu nunca a accede na 15 cacho cu no ta ni di Dichi pa cuida. Ruman homber di Dichi a informe caba cu si e no saca e cachonan pa diamars for di su cas, e mes lo habri haula y laga tur los.
E persona Kiki aki a tuma un gesto caminda a duna un man y bay cu e confiansa pa haci deshaci na cas di hende cu 15 cacho den un situacion cu a bay for di man.
Dichi kier evita lo peor
Problema familiar ta birando hopi tensa, bsiñanan ta yama polis practicamente tur dia pa duna keho di desordo cu e cachonan ta causa anochi strobando e trankilidad pa nan por drumi y espacio pa tene e cachonan aden a caba. Dichi ta preocupa cu si e ruman habri haula cu e cachonan por atak’e y mord’e door cu nan no ta custuma cu ne.
A duna 4 ora pa bin busca e cachonan
Dichi a tuma contacto cu e persona/ doño di e cachonan pa e bin busca su cachonan of atene na e consecuencianan. E no ta bay tene nan mas y ta bay laga tur liber. Polis cu tabata presente a haya un splicacion di e situacion, a acorda cu Polis tambe cu pa 2or di atardi ( cu ta e Ultimatum ) lo tuma contacto cu nan bek pa asina disidi unda y/o kico lo ta e siguinte paso pa cu e cachonan aki.
E persona Kiki a bin laga e cachonan aki for di 15 di october sin cuminda, sin cuido, sin intencion pa busca solucion pa unda hibanan y e peso aki a cay riba Dichi cu a pone un stop permanente na e problema awe diamars caminda e la informa cu e no ta bay haci cargo mas di cacho cu no ta di dje.
Ta busca e cachonan of tur cacho ta bay los pa awe tardi 2:00PM
