Hans Klaver ta Hoofdofficier den e caso Eugene, cu lamentablemente tabata tin un
desenlace tristo. E hobencito di 3 aña cu Aruba henter tabata en busca, a wordo haya sin
bida. El a comenta cu e padrastro a duna declaracionnan unda cu el a admiti unda e curpa
di e mucha tabata dera.
Awe mainta a haci un investigacion den e vecindario di Savaneta unda cu a bin haya e curpa dera den un tereno habri. Lamentablemente a bin haya en berdad e curpa di e mucha. Esaki sigur ta un noticia teribel, banda di esun cu ya ta conoci caba den comunidad, di e mucha di 5 aña, kende a fayece den Hospital. Por bisa hopi cos di e tata, pero a bin saca afo for di dje, cu e tabata envolvi den morto di ambos mucha. E investigacion ainda ta andando. Ainda tin dos miembro di famia deteni, cual ta e wela y e mama di ambos mucha. Hoofdofficier Klaver no por a bisa mucho cos mas di e caso, pero e investigacion tin cu sigui riba e caso aki. Hoofdofficier Klaver a sigui splica durante di e conferencia di prensa yama cu urgencia awe merdia, cu tin varios aspecto di e caso aki no por wordo divulga, ni cuanto tempo e curpa tin dera. E caso aki sigur ta uno complica, segun mr. Klaver y ta considera esaki como un homicidio culposo (Dood door schuld).
