Net momento cu e famianan ta preparando pa duna e aña nobo un bonbini, un chauffeur a perde control di auto y dal contra muraya.
Tabata alrededor di 9:00 pm na momento cu un chauffeur a perde control di su auto na Tarabana. Segun informacion no oficial, algo of un hende lo a bay pa pas’e, motibo pa cual el a perde control riba su Toyota modelo Corolla numera A-1023. El a bay na su banda robes y dal contra muraya. E impacto tabata asina fuerte cu ambos ‘airbag’ a activa.
Loke tabata remarcabel cu na momento cu polis a pidie pa su identificacion, e no por a saca esaki. Tur loke e por a saca ta su carch’i banco. Riba dje su lenga tabata un poco pisa. Mirando cu e tabata keha di dolor, polis a opta pa yama un ambulanc’e n’e sitio pa asina atende cu e chauffeur pa mira si por tabata algo mas serio.
