Diasabra, prome di januari a celebra e prome Santo Sacrificio di misa na Alto Vista, na honor di Mama Maria, mama di Señor y mama di Iglesia. Segun pastoor Juancho Pilongo kende ta dirigi centro pastoral di Aruba na Santa Cruz, ta hopi contento di por a dirigi e misa aki, cu tin di agrega tabata hopi bon atendi, a pesar cu hopi a keda lanta te laat p’e tiramento di klapchi.
Pero toch nos pueblo hopi religioso, ta corda riba Mama Maria.
E ta parti di nos cultura, unda cu nos ta corda riba nos mama, cu ta e forsa di cada famia. Mescos cu Iglesia, nos ta corda riba Mama Maria y den cada famia tambe nos ta corda riba nos mama, sea nan a bay laga nos caba of te ainda nan t’ey. E deseo pa nan ta pa nan sigui paz cu nan yiunan y ser keri.
Pastoor Pilongo a sigui bisa cu tin diferente actividad di parokia. Ta hopi gradicido na pastoor Santiago pa haci e celebracion aki tur luna, pero tambe e parokia tin su misanan semanal na Alto Vista.
Aworaki nos mester lubida riba cos negativo, mira loke ta positivo den nos cultura y creencia y ohala esey por trece tur hende hunto den famia.
Pa un cobertura mas amplio lesa e proximo edicion di TREMPAN.
