Diadomingo awo, dia 12 di november, ta tuma luga e di seis edicion di e Diabetes Run & Walk. E di seis edicion di Diabetes Run & Walk lo tuma luga na Botica Eagle unda participantenan lo ta coriendo hunto pa recauda fondo pa Jump18.
Franz Sydow, organisado di Diabetes Run, a splica cu esaki ta di seis bes nan ta organisa e careda aki. Ta organisa e evento aki cu e meta pa conscientisa e pueblo di Aruba riba e problema grandi cu tin cual ta diabetes. E enfermedad aki ta uno hopi grandi aki na Aruba. E informacion di averahe mundial di diabetes ta cu diesseis porciento di poblacion tin diabetes.
Tur persona tin hende cercano, familiar cu ta bezig cu e problema aki y door di e careda a logra conscientisa pueblo cu mester tin un cambio. Un cambio unda tin un poblacion mas saludabel.
Dokter Jamiu Busari, lider di proyecto Jump18, a splica cu e motibo p’e evento aki ta pa trece mas atencion riba un bida mas saludabel. Nan ta mira n’e hubentud, mucha, di e isla tin sobrepeso y e ta un problema cu ta aumenta. Diabetes ta un consecuencia di sobrepeso y obesidad entre e hobennan, y si no haci nada dentro di algun aña por mira cu hende no tin problema di diabetes so pero hipertension tambe lo aumenta riba e isla.
Danique Lande, case manager y coordinador di grupo di Jump18, a splica cu nan ta un organisacion cu ta traha cu muchanan entre cuater cu diesocho aña. E hobennan ta inscribi cerca Jump18 y pa seis luna largo nan ta volg un programa. Nan ta haci ehercicio tres bes pa siman, ta haci tayer, e hobennan ta siña di nutricion y hopi mas. Durante e programa nan ta siña hopi cos, y un bes pa luna e hobennan ta bay na e kinderpolie. Aki nan ta pasa cerca un dietista, case manager y dokter di mucha.
Emilane Geerman, mercadeo di Royal Aruba Aloe, a splica cu nan ta contento y orguyoso di forma parti un biaha mas n’e di seis Diabetes Run & Walk 2023. Royal Aruba Aloe ta enfatisa y ta haya cu ta sumamente importante no solo como compania pero como comunidad tambe pa trece mas conscientisacion. Incluso conscientisa e comunidad e casonan di diabetes na Aruba.
