“E critica principal cu mi sa haya di ‘politica’ ta cu mi ta considera tur politico igual. Tanto AVP-ista como MEP-ista ta sinti nan mes ofendi, pasobra segun nan ‘e otro’ ta hopi pio. Ademas, varios ta sinti nan mes personalmente agredi, mientras cu den nan wowo esey no ta corecto. Den esey nan ta puntra nan mes for di unda mi ta saca tur informacion. Finalmente algun ta acusa’mi cu, pa motibo di mi articulonan, mi lo ta contra Aruba”, asina Armand Hessels a duna di conoce den un relato.
Tur dos mescos?
Manera por deduci di practicamente tur mi articulonan, tanto AVP como MEP a haci nan mes culpabel na malgobernacion structura durante decada. Tur dos a comete patronahe politico riba escala grandi, tawata responsabel pa administracion financiero sistematicamente deficiente y pa ‘proyecto dudoso’. Pues, en cuanto calidad, practicamente no tawatin casi diferencia.
Pero si en cuanto cantidad. AVP ta responsabel pa 75% (3/4) di e debe nacional y consecuentemente MEP pa ‘solamente’ 25% (1/4). Riba dje ta resulta for di un analisis di varios rapport di ‘proyecto dudoso’ cu AVP tin hopi mas riba su cuenta compara cu MEP. Pero…manera den e caso cu un ciudadano ta horta Afl. 50.000 y e otro Afl. 5.000, hues ta sentencia tur dos pa ladronicia!
E sapato no ta pa tur hende bisti…
Normalmente (excepto caso excepcional) mi no ta comenta tocante persona, sino mi ta enfoca riba ‘gobierno’ y ‘partido politico’, mescos cu nos institutonan sa haci. Pues, si mi expone cu un ‘gobierno’ a hiba un malgobernacion, ta bon posibel cu ministro individual a haci tur nan esfuerso pa hiba un maneho positivo. Asina ta conoci cu varios ministro di finansas kier a mehora situacion, pero no por a contraaresta colega cu otro ‘intencion/plan’. Y sigur (tawa)tin ministro integro, di cual hasta a nombra un como gobernador cu aprobacion general. Pero lamentablemente nan tawatin poco influencia riba e trend general negativo.
E fuentenan
Pa esunnan cu sa lesa rapport di SER, Conseho Consultativo, Controlaria general, CAft, Banco Central, IMF y yen di comision cu gobierno mes a instala, tur locual mi ta skirbi, ta reconocibel. E base di gran mayoria locual mi ta skirbi, ta sali for di e rapportnan aki, aki aya dorna cu informacion di funcionario (oficial y integro) cu experticio al caso. Esey ta por ehempel den caso cu mi mes tin mester di mas splicacion. Cu otro palabra, esunnan cu seriamente profundisa nan mes den e rapportnan menciona, lo saca exactamente mesun conclucion. Como cu e informacion aki, por lo general den idioma diplomatico, ta describi den miles di pagina y decenas di rapport, pa comodidad di tur hende mi a recapitula e informacion- y conclucionnan principal den 6 rapport tematico den idioma cla y cu referencia extenso na e fuentenan.
Anti-Aruba?
Hopi hende ta experencia critica como un atake personal di parti di oponente. Y sa interpreta (manipula!) critica contra gobierno di Aruba como critica contra Aruba. Mayoria di biaha no tin e minimo reflexion tocante e posibilidad cu e critica lo por ta na su luga y cu di berdad tin motibo (urgente) pa cambia situacion. E hecho cu e coalicion actual tin como su metanan principal: bon gobernacion, transparencia y integridad, ta demostra cu mi critica durante tur e añanan, tawata na su luga. Pasobra tur ta tema cu mi a atende durante decada. Tambe e reconocimento den e recien ‘Nota Hervormingen Aruba’ di juni 2020, cu “Aruba ta consciente cu no por sigui pospone reforma y cu mester reforma riba escala grandi”. Esey ta trece na cla cu no ta esun/esunnan cu durante decada (t)a critica gobierno y ta boga pa reforma ta ‘anti-Aruba’, sino hustamente e gobernantenan cu a tira tur advertencia y recomendacion pa mehoracion den bari sushi. ESEYNAN ta e hendenan cu a hinca Aruba sin misericordia den un abismo.
Conclucion
No ta nada asombroso cu, a base di tur e conocemento adkiri, di ningun manera mi no ta kere (mas) den e abilidad di ‘politica di partido’ pa e mes mehora su calidad drasticamente den un termino rasonabel na beneficio di comunidad. Consecuentemente mi conclucion cu mester reforma nos sistema politico drasticamente. Pesey mi a lansa un modelo democratico nobo den cual e ‘politica di partido’ no por sigui limita e Arubianonan cu potencial (cu sigur tin!). Naturalmente tambe tin otro posibilidad cu lo por expone den un dialogo nacional. Pero sigui riba e mesun caminda en todo caso ta un opcion. E ora ey Hulanda lo mester sigui ranca nos na nos orea pa tene nos atencion n’e les.
