Indice di Prijs di Consumo (CPI) pa luna di september 2021 ta 99.24, loke ta representa un subida di 0.4% compara cu e indice di Augustus 2021 (98.84) y acumulando un subida di 2.2% te cu na september di e aña aki, segun e informe saca pa Oficina Central di Estadistica.
E cambio di e CPI pa e ultimo diesdos (12) lunanan (september 2020 te cu september 2021) ta 2.2%, un subida di 4.5 punto di porcentahe (ppt) compara cu e periodo corespondiente di aña pasa (-2.3%).
E promedio anual di e indice di inflacion pa e periodo di september 2020 te cu september 2021 ta -0.7%, un caida di 1.1 ppt compara cu e 0.4% registra den e periodo di september 2019 te cu september 2020.
Durante e luna aki, shete (7) di e diesdos (12) sectornan a registra subida di prijs. E subidanan cu tabatin e mayor efecto riba e CPI registra p’e sectornan di ‘Mobiliario’ (3.6%) y ‘Paña y sapato’ (3.7%), causando un efecto di 0.33 y 0.09 ppt. E subidanan den e sectornan restante a contribui cu un efecto di 0.28 ppt riba e CPI di september 2021. A contraresta e subidanan aki parcialmente door di principalmente un caida den e indice di e sector di ‘Transporte’ (-1.2%) cu a contribui cu un efecto di -0.16 ppt riba e CPI di september 2021. E caidanan den e restante sectornan a contribui cu un efecto di -0.14 ppt riba e CPI di september 2021.
E subida den e sector di ‘Mobiliario’ causa pa principalmente un subida den e categoria ‘Aparato pa uzo domestico’ (12.6%), causando un efecto di 0.30 ppt. E subida den e sector di ‘Paña y sapato’ causa principalmente pa un subida di 3.9% den e categoria ‘Paña’, causando un efecto di 0.08 ppt.
Caida den e sector di ‘Transporte’ causa principalmente p’e caidanan den e categorianan ‘Servicio di transporte’ (-16.3%) y ‘Compra di vehiculo’ (-1.6%), causando un efecto di -0.08 y -0.07 ppt, respectivamente.
Canasta di consumo
Canasta di consumo di CPI ta consisti di 408 bienes y servicio. Compara cu 2021, 44.1% di e bienes y servicionan aki a conoce un aumento di prijs causando un efecto di 1.26 ppt, mientras cu 39.7% ta mustra un caida di prijs, cu a contribui cu un efecto di -0.86 ppt y pa e restante 16.2% no tabatin cambio den prijs. Prijs di bienes a subi cu 0.9% y a causa un efecto di 0.49 ppt. Prijs di servicio a conoce un caida di 0.2% y a causa un efecto di -0.09 ppt riba CPI di september 2021.
Core inflation
E CPIC (core inflation) – CPI excluyendo e efecto di energia y cuminda – a registra na september 2021 un caida di 1.2%. Indice di energia – cu ta consisti di e productonan: electricidad, awa, gasolin y diesel a registra un subida di 2.0%. E indice di cuminda a registra un caida di 1.7%.
Bestaansminimum
Bestaansminimum pa un hogar consistiendo di dos (2) adulto y dos (2) mucha (edad 0-15 aña) na september 2021 ta Afl. 4,839, un subida di Afl. 57 compara cu september 2020 (Afl. 4.782). E bestaansminimum pa un hogar di un (1) adulto ta Afl. 2,304, un subida di Afl. 27 compara cu september 2020 (Afl. 2.277).
Cambio di prijs di petroleo, utilidad, gasolin y diesel na september 2021
Prijs di utilidad (electricidad y awa), gasolin y diesel ta determina primordialmente p’e prijs internacional di petroleo. Na september 2021 prijs promedio pa bari di petroleo (US$ 70.50) a conoce un subida di US$ 2.88 (4.3%) compara cu Augustus 2021 (US$ 67.62).
Prijs di electricidad y di awa no a cambia compara cu Augustus 2021. Consecuentemente, e prijs promedio di electricidad pa vivienda a keda Afl. 240.09, mientras cu e prijs promedio di awa pa vivienda a keda Afl. 137.05.
Prijs di gasolin a registra un caida di Afl. 2.10 cen (-0.9%) na september 2021 y a causa un efecto di -0.04 ppt riba e CPI. Prijs di diesel a registra un caida di Afl. 3.70 cen (-2.0%) na september 2021 y a causa un efecto di -0.01 ppt riba e CPI.
September 2021, utilidad, gasolin y diesel como grupo, tabatin un caida di prijs di 0.3% compara cu Augustus 2021 y hunto tabatin un influencia di -0.05 ppt riba e CPI, mientras cu e restante 404 bienes y servicio hunto, a conoce un subida di prijs di 0.5% y tabatin efecto un efecto di 0.45 ppt riba e CPI.
Cambio di prijs di cuminda y servicio di catering na september 2021
E indice di ‘Cuminda & servicio di catering’ a registra un subida di 0.5% na september 2021, despues di un subida di 0.7% na Augustus 2021. E indice di ‘Cuminda na cas’ (0.6%) a registra un subida, unda nuebe (9) di e diesun (11) indicenan di e grupo di cuminda na cas a subi na september 2021. E indice di ‘Fruta’ a conoce e subida di mas grandi (4.7%) na september 2021. E indicenan di ‘Azeta y otro producto traha di vet’ (1.8%), ‘producto restante pa alimentacion’ (1.5%), ‘Batata, yuca y batata dushi’ (0.9%) y ‘Berdura’ (0.5%) tambe a registra subida.
E indice di ‘Pisca y otro cuminda di lama’ (-1.9%) a registra e caida di mas grandi na september 2021. Ademas, un caida di 0.7% a wordo registra den e indice di ‘Lechi, keshi y webo’.
Den e ultimo diesdos (12) lunanan e indice di ‘Cuminda y servicio di catering’ a subi cu 1.6%. E indice di ‘Cuminda na cas’ a conoce un subida di 1.2%. E indice di ‘Azeta y otro producto traha di vet’ a subi cu 6.8%, e subida di mas grandi entre e gruponan di cuminda na cas, mientras cu e indice di ‘Berdura’ a baha cu 3.8%, e caida di mas grandi entre e gruponan di cuminda na cas.
E indice di ‘Cuminda pafo di cas’ a subi cu 0.5% na september 2021 y a registra un subida di 2.5% den e ultimo diesdos (12) lunanan.
Na september 2021, ‘Cuminda na cas’ y ‘Cuminda pafo di cas’ como grupo, tawata tin un subida di prijs di 0.5% compara cu Augustus 2021 y hunto tawata tin un influencia di 0.08 ppt riba e CPI, mientras cu e restante bienes y servicio hunto a experencia un subida di prijs di 0.4% y tawata tin un efecto di 0.32 ppt riba e CPI.
Bestaansminimum na september 2021
E bestaansminimum ta e nivel minimo di entrada cual ta wordo percibi cu ta necesario pa logra mantene un nivel di bida adecuado den un cierto pais. Usualmente e bestaansminimum ta wordo determina door di calcula e gasto di tur e recursonan esencial cu un adulto ta consumi den un luna of aña. Generalmente esaki ta wordo yama un indice basico di necesidad y e ta varia segun e prijs di cuminda, paña, vivienda, transporte y otro articulo den e ‘canasta’. Escala di ekivalencia ta uza pa ahusta e nivel minimo di entrada percibi p’e hogarnan di diferente tamaño y composicion. E escala ta asigna un peso di 1.0 pa e prome adulto y 0.5 pa cada adulto adicional den e hogar (edad 16+) y un peso di 0.3 pa cada mucha (edad 0-15 aña). E bestaansminimum ta basa riba cifra di e rapport ‘Bestaansminimum 2010’ cu CBS a publica na december 2010 y actualisa mensualmente pa inflacion uzando e CPI mensual. E unidad di referencia den e rapport aki ta di un hogar cu ta consisti di dos (2) adulto y dos (2) mucha (edad 0-15 aña).
Na september 2021 e bestaansminimum mensual pa un hogar cu ta consisti di dos (2) adulto y dos (2) mucha (edad 0- 15 aña) (Afl. 4.839) ta mustra un subida di Afl. 57 compara cu september 2020 (Afl. 4.782) y causa principalmente door di un subida di afl. 30 den e sector di ‘transporte’. Na september 2021 e bestaansminimum mensual pa un hogar cu ta consisti di un solo adulto ta Afl. 2.304, cual ta representa un deficit di entrada di Afl 489, un subida di Afl. 27 compara cu e deficit observa un aña pasa (Afl. 462). E deficit aki ta e di tres mas halto registra den un periodo di seis (6) aña pa luna di september.
