Debi na e pandemia, varios atleta a haya nan mes confronta cu e hecho lamentabel di no por practica nan deporte. Sinembargo, ya e situacion ta na caminda pa normalidad y asina nos atletanan por sigui atende competencia di nivel halto tanto nacional como internacional. Y esaki ta e caso p’e dos atletanan di gymnastiek Ashley Provance y Amika Every. Ambos lo ta competiendo den e Campeonato Sudamericano Adulto de Gimnasia Artistica na Buenos Aires, Argentina cu lo tuma luga di dia 8 pa 13 di december.
Jimmy Palma, coach di seleccion nacional di gymnasia di Aruba a splica cu esaki ta prome biaha cu lo bay competi den un competencia Sur Americano cu dos atleta adulto. Palma a pidi un poco sosten y colaboracion di e pueblo di Aruba p’e dos atletanan aki. Pa motibo di e pandemia andando, nan tabatin algun dificultad cu subsidio y esaki a haci cu tabata dificil pa adkiri e pasashinan. Specialmente pa e dos mucha muhenan aki cu lo bay representa Aruba. Si tin cualkier persona cu kier brinda nan sosten, por tuma contacto cu e federacion di gymnastiek di Aruba.
Ashley Provance, di 16 aña di edad a bisa cu e ta bezig ta train tur dia y ta haci su best pa logra tur elemento pa ora e bay e competencia e sinti su mes cla pa esaki. Di su banda, Amika Every cu tin 15 aña di edad a conta cu su specialidad den gymnastiek ta e bara, cu ta locual e ta sinti e ta presta miho riba dje. A pesar cu ta prome biaha cu ambos atleta lo competi den un competenciaasina grandi, nan ta dunando tur di nan parti pa por representa Aruba dignamente.
Pa cobertura mas amplio lesa edicion di TREMPAN mañan.
