“Un di e metanan cu Prome Minister mr. Evelyn Wever-Croes a propone desde cu el a cuminsa goberna nos pais na 2017, ta pa baha gasto di personal despues cu a constata e gasto halto den personal y salario bou di e Prome Minister anterior, Mike Eman. Esaki ta e caso tambe ainda y mas ainda den e situacion cu nos Pais ta den na unda cu mester baha gasto di personal y cumpli cu exigencianan di Hulanda”, asina un comunicado di prensa emiti pa oficina di minister-president ta bisa.
Un ehempel di esaki ta cu Gobierno di Aruba a baha gasto cu nombracion di Ady Thijsen recientemente como Minister Plenipotenciario Interino na Arubahuis. Thijsen ta tambe e representante pa Aruba di Union Europeo na Brussels y ta Presidente di ExCo di OCTA. E tin dos funcion na Europa pero un solo salario y por bisa cu siguridad cu Thijsen ta eherce un trabou excelente den ambos funcion, na opinion di minister-president.
Ambos funcion ta resorta bou di Ministerio di Asuntonan General di Prome Minister. Esaki ta haci cu e ministerio aki ta baha gasto no solamente di salario, pero tambe di hospedahe. Cu esaki tambe, Prome Minister no tin mester di gasta na biahe pa Hulanda frecuentemente. Ady Thijsen den su funcionnan ta representa Aruba den Gobierno di Reino y ta studia tur documento y leynan cu tin di haber cu reino. Den esaki Thijsen su so lo haci e trabou cu Guilfred Besaril y Eddie Paris tabata haci.
Prome Minister Wever-Croes a enfatisa cu e problema di gasto di personal a sali for di man bou di Gabinetenan Eman. Nan a tuma cantidad grandi di persona den servicio. Desde cu Gabinete Wever-Croes ta na mando, e gastonan di personal a baha so. Contrario na Eman, Prome Minister Evelyn Wever-Croes ta tuma gobernacion hopi na serio y ta traha na bienestar di nos pueblo cu cantidad minimo di personal pa asina tene gastonan di personal mas abou cu por.
Eman a traha cu 147 persona directo bou di su ministerio cu a costa nos pueblo 11.323.300 florin na salario. Mientras e gastonan di Ministerio di Asuntonan General 2017 pa 2021, Prome Minister Wever-Croes a traha cu 22 persona den su oficina, esaki ta 125 persona menos y 85% menos di loke Eman a traha cu ne. E 22 personanan aki a costa 2.738.300 florin na salario. Esaki ta 8.585.000 florin menos y 76 % menos di loke Mike Eman tawata gasta na salario.
Y pa e di dos periodo di gobernacion, Prome Minister Wever-Croes a baha gasto di personal mas ainda, trahando cu 21 persona, cu un total di 2.342.591 florin na salario. Esaki ta 8.980.709 florin menos y 79% menos di loke Mike Eman tawata gasta na salario.
Prome Minister Evelyn Wever-Croes: “Hunto, mi oficina, mi ministerio, cu ta inclui ami, mi secretaria, mi conseheronan y tur cu ta traha pa mi den mi oficina, a logra baha gasto. E no ta facil. Tin hopi menos hende y e trabou mester wordo parti den menos hende cu ta haci e trabou hopi mas dificil. Pero mi ta hopi satisfecho cu e sosten cu mi ta haya di tur esnan cu ta traha pa mi oficina”.
Nota di redaccion: Gobierno no ta menciona si Ady Thijsen a caba di pasa su screening obligatorio. Tambe mester splica cu, den rapport di CAft, nan ta papia di aumento den gasto di personal. Pues, CAft ta acusa Gabinete Wever-Croes cu nan a aumenta gasto di personal y gasto operacional, hasta mas prome cu pandemia.
