E consecuencianan di e pandemia pa pais Aruba y e mundo ta conoci pa un y tur. Hopi economia a haya un golpi duro y inespera cu a kraak pais grandi y chikito. Aruba siendo un isla chikito cu un pilar economico so, a sa di dal paso grandi y serio den direccion di un recuperacion total di su turismo. Nos por a wak caba cu tin varios luna den cual a kibra record di turista y entrada den e lunanan di april cu 108%, mei cu 103% y tambe juni cu 103% di recuperacion compara cu 2019. Juli 2022 ta marca otro luna cu a logra kibra e record di juli 2019, señalando cu Aruba su turismo ta acelerando su recuperacion.
Dialuna durante su conferencia di prensa minister Dangui Oduber a pasa riba diferente indicador cu ta indica e performance di e crucero- y hotelnan ta recuperando constantemente. Esaki ta indica alabes cu e strategia cu a bin ta uza for di cuminsamento di aña ta dunando su fruto. Pa loke ta e recuperacion di barconan crucero, e cifranan ta poco mas abao. Esaki ta debi cu e protocolnan pa barco crucero ta hopi mas halto y exigente y a causa tardansa pa wak mas barco cuminsa yega na Aruba. E recuperacion proyecta na final di 2022 ta alrededor di 65%. Kiermen, aki ainda tin hopi oportunidad pa crecemento y ta proyecta un bon recuperacion pa e siguiente 6 lunanan y 2023.
Segun IMF Aruba ta haciendo un trabao excelente y a declara den su rapport cu “Aruba a move rapidamente for di e pandemia”. Actualmente Aruba a recupera 92% di su turismo. E porcentahe aki ta pa via cu e variante Omicron a afecta nos pais den januari y februari specialmente, sino esaki por tabata mas halto ainda. E resultadonan pues ta mustra hopi positivo y ta proyecta avance nan significativo den e sector turistico.
For di aki mi kier a felicita minister Dangui Oduber y su ekipo cu a traha hopi duro pa lanta nos turismo bek. Ademas mi kier a felicita ATA y tur esunnan cu ta traha den e sector turistico pa nan trabao duro y yen di enfoke. Hunto nos tur por yuda nos pais recupera for di e retonan economico cu nos tin nos dilanti.
Si pueblo desea mas informacion di e articulo aki, contact mi na tel: 528-4639 of email mi na: [email protected] / Bo Parlamentario y sirbidor di pueblo na bo ordo semper!
