Na momento cu College Aruba financieel toezicht (CAft) a entrega su ultimo rapport, por a tuma nota di surplus cu a constata riba presupuesto 2023 di AZV. Nan a papia di un suma di 54.1 miyon florin. Algo cu hamas den historia di AZV nan a yega di conta riba dje. Pero no ta semper lo bay tin surplus, ir. Edwin Jacobs, director di AZV a bisa den un conferencia di prensa dialuna.
E surplus aki ta algo cu en realidad nunca a pensa di logra y awo cu esey a sosode den 2023, mester a formula un maneho di kico ta bay haci cu e placa. Yega gast’e no ta un solucion, pa motibo cu den futuro lo no bay mira e tipo di surplus aki mas. Esey ta motibo cu mester a scoge un formula con ta bay inverti e placa. “A pensa pa inverti esaki den productonan cu no ta riesgoso. P’esey a dicidi cu lo hinca e placa aki den time-deposit.
E meta di haci tipo di inversionnan asina ta pa no laga e placa keda sinta y comi door di inflacion. Ta busca algo pa e suma aki no perde su balor. E ta nifica cu si haya un interes igual na e inflacion, e lo no perde su balor cu tempo.
AZV ta calcula cu den 2024 lo haya un surplus atrobe, pero menos cu e suma logra den 2023. Y asina e lo sigui baha. Nan ta kere cu aki cinco aña AZV lo no tin surplus mas. “E ora nos lo cuminsa come di loke a pone den e spaarpot. Esaki ta e forma cu mester maneha AZV, esta cu semper mester tin un spaarpot pa ora di deficit.”
Aruba ta drentando un era diferente den maneho di AZV. Antes loke cu tabata falta ta pone riba cuenta di gobierno y nan mester paga. Pero e no ta e caso awendia mas.
Ademas, mester tene cuenta cu den futuro cercano, e crecemento economico lo ta menos. Esaki pasobra lo bay tin mas trahado pa e proyectonan hotelero nobo y e gastonan ta bay crece mas rapido di loke e entradanan lo crece.
