Minister di Turismo, Dangui Oduber, tabata presente n’e conferencia di Global Sea Trade Miami. Esaki no ta prome bes cu e minister a presencia e conferencia aki. Sostenibilidad tabata un topico cu a bin dilanti pa tur e companianan crucero como destinacion.
Segun e mandatario, e tabata contento di por a atende e conferencia aki na Miami. Tur aña nan ta purba di ta n’e conferencia aki pa mustra Aruba como destinacion y mustra kico tur ta haciendo, kico ta e desaroyonan, e retonan. Tabata presente na e conferencia aki hunto cu e director di Aruba Ports Authority (APA), Mark Figaroa, y e manager di comercio, Mario Arends. Hunto cu nan tabatin representante di Aruba Tourism Authority (ATA).
Ta considera e conferencia esun di mas grandi na mundo y p’esey ta importante e presencia di Aruba. Un di e temanan di e aña aki cu ta hopi discuti pa tur compania crucero cu tabata presente como e destinacionnan cu a mustra loke tin di ofrece, tabata riba sostenibilidad.
Aruba ta posiciona su mes como un lider den esaki, di cual tin un maneho dirigi riba sostenibilidad, riba un crecemento aceptabel, un crecemento manehabel. Esaki ta e temanan cu Aruba discuti cu diputado Clark Abraham di Boneiro di economia y turismo. A papia riba e echo pa Aruba, Boneiro y Corsou bin cu un maneho unda ta dirigi e direccion cu kier bay. Asina ey ta den e ‘driver seat’ unda conhuntamente por negocia kico t’e deseo pa futuro. Esaki ta un tema cu ta biba cerca e destinacionnan, pero e ta un tema hopi actual cerca tur e lineanan crucero.
Reuni cu Boneiro
Un di e temanan trata cu Boneiro ta riba e beleid, e maneho cu Aruba kier propone na Corsou y Boneiro. Segun e mandatario, asina ey hunto por tin un maneho cu por presenta na e lineanan crucero. Ta hopi conoci cu e lineanan crucero mester tin un iterinario di A-B-C (Aruba, Boneiro y Corsou). Aruba ta situa n’e parti sur y e lineanan crucero tin un iterinario cu ora di sali fo’i Merca ta dura shete pa nuebe dia. Momento cu e linea crucero ta bin direccion e banda di Caribe di Aruba, nan ta inclui sea Aruba-Boneiro of Aruba-Corsou of tur tres.
Esey ta pone cu e tres islanan mester traha hopi estrecho cu otro y asina ey tin un maneho riba sostenibilidad. Tambe hunto por tin un maneho den crecemento, kico ta un crecemento balansa pa Aruba, Corsou y Boneiro. Pasobra na momento cu un di e islanan tuma un decision, e por tin consecuencia pa otro.
Den pasado Boneiro tabatin e maneho cu nan ta acepta un barco crucero pa dia. E administracion nobo a opta pa no wak e asina, pasobra e por ta un barco grandi of chikito. Nan ta bay cambia y ta lo enfoca riba cantidad. Ta bay mira kico ta e cantidad cu nan por absorba, maneha. Esey ta e direccion cu e mandatario kier pa bay conhuntamente cu e islanan.
Call di linea crucero
Aruba a haya call di e linea crucero Ritz Carlton, pero tambe di Four Seasons. Esaki ta crucero mas chikito, pero cu poder di compra mas grandi. Di stimula pa tin mas linea crucero ta un tipo di maneho cu gobierno kier ehecuta na Aruba. Di tin un maneho cu ta dirigi mas riba crecemento sostenibel, un crecemento aceptabel. E enfoke principal ta dirigi riba e turista afluente.
Barco mas chikito, turista di mas calidad cu tin un capacidad di gasta mas grandi y cu por laga mas placa atras den e economia.
Gobierno ta contento di tin Ritz Carlton cu algun calls pa aña. Four Seasons tambe tin algun calls pa Aruba den proximo luna en adelante. Esey ta e enfoke cu tin pa futuro y asina ey por mantene e cantidad cu tin, pero cu barco chikito. Asina ey por ofrece un miho experencia na tur turista di barco crucero.
