Dialuna dia 18 di juli ultimo, Prome Minister Evelyn Wever-Croes a reuni cu e comandante cu ta saliendo y e comandante nobo di Mariniers Kazerne. Commandant van Beekhuizen tin ya caba casi tres aña na Aruba y lo bandona Aruba y na su luga ta bin Commandant van Wijk. Durante e reunion a refleha bek riba e ultimo tres añanan aki y e manera con esaki a bay.
Prome Minister a remarca cu e relacion di Gobierno y Mariniers Kazerne ta hopi estrecho. Gobierno por a conta riba ayudo di Mariniers Kazarne momento cu tabata tin mester. Durante e tres aña di Commandant van Beekhuizen, a logra e trayecto di formacion social pa
nos hobennan mucha muhe.
“Esaki ta un logro hopi importante pa cua mi ta hopi orguyoso di dje. Esaki ta algo cu a tuma hopi preparacion y tambe su riesgonan pero ultimo nos por a mira e resultadonan y mi a keda hopi impreciona di cada un di e damanan cu a caba e formacion social”, Prome Minister a expresa.
E deseo awo ta pa cuminsa un di dos trayecto y lo cuminsa traha riba e manera con pa genera e interes den nos hobennan mucha muhe pa sigui den e trayecto di formacion social aki. “Mi ta desea Commandant van Wijk hopi exito cu su funcion nobo. E momento di traspaso oficial lo ta na augustus pero ya awe mi a cera conoci cu ne y mi ta sigur cu e temporada nos dilanti tambe, e cooperacion ta bay ta hopi estrecho”, Prome Minister a duna di conoce.
