Riba diadomingo, 26 di juli 2020, directiva di e Organisacion di Pensionado Publico Arubano (OPPA) a tene su prome Reunion General pa e aña aki. E reunion aki a tuma luga den Renaissance Convention Center, a cuminsa 9:15 am y a termina banda di 12:00 pm. Despues di e reunion e miembronan tabatin un ora pa socialisa.
OPPA su prome reunion general tabata planea pa tuma luga riba diadomingo, 17 di mei 2020, pero entrada di Covid-19 na Aruba a obliga directiva pa cambia e fecha di e reunion pa 26 di juli 2020. Ademas di e reunion, directiva a hay’e obliga pa cancela tur e actividadnan cu tabata planea den e lunanan cu nos tabata na cas cu “Shelter In Place” y “Toque De Queda”.
Nos bida diario a normalisa un poco, pero esey no ta kita cu nos organisacion tambe tin e obligacion di atene su mes na e normal nobo y ta p’esey directiva a busca un luga c’un espacio basta amplio. Nos a tene cuenta cu e confortabilidad y e seguridad necesario pa mas o menos 150 miembro por ta hunto, sin lubida e distanciamento social (fisico) y e protocolnan vigente.
Mas of menos 150 miembro tabata presenta na e reunion, apesar cu e tempo tabata na awa. Na entrada tur cu a presenta a haya un tapa boca (mondkapje) y tambe a midi nan temperatura.
E presidente, Ivo Valdes, a habri e reunion splicando e protocol vigente ya anuncia e programa di dia. Ademas di tur e puntonan riba agenda, e miembronan a haya un splicacion extenso tocante e caso di ahustacion di pensioen (Afl. 85,-), e status tocante e traspaso di tereno pa construi e edificio OPPA. Tambe directiva a duna informacion tocante revision di e Statuto y e Website di OPPA. Un di e topiconan cu a bolbe bin dilanti ta e asunto tocante e prima halto di AZV cu nos miembronan tin di paga pa menos servicio. E miembronan ta haya cu no ta husto cu desde cu a introduci AZV, e pensionado cu tin un entrada extra banda di su pensioen di behes di SVB, e.o. pensioen di APFA, di APC, un uitkering bij wijze van pensioen, of cu a sigui traha of ta ricibi huur di un di dos cas of apartamento, nan ta haya e cualificacion di independiente (“zelfstandige”), haciendo cu nan tin di paga un prima mas halto na AZV.
Desde su fundacion, OPPA, cu ta un grupo di interes (belangenvereniging) y no un sindicato, semper a lucha pa defende e interesnan di su miembronan y pa haya un miho representacion den nos sociedad. Pa OPPA ta hopi importante pa tur instancia, incluso Gobierno, realisa cu e pensionadonan ta sigui hunga un rol importante den nos comunidad y den e progreso di nos pais.
Den turno liber e miembronan a haya oportunidad pa haci nan pregunta of trece nan remarca relaciona cu e puntonan di agenda y tambe tocante e informacion ricibi durante participacion. Despues di e reunion e miembronan por a socialisa un rato y a bay cas satisfecho cu tur e informacion ricibi. Nos grandinan tambe tin un opinion, imaginacion, expectativa y derecho.
