Oposicion a duna nan comentario riba e expresionnan pisa haci door di Presidente di Parlamento mr. Edgard Vrolijk den e reunion na Sint Maarten y gran mayoria no tabata di acuerdo y hasta a catalog’e como un Tiger di Papel. .
E parlamentario independiente Gerlies Croes a mustra comprension pa e expresionnan haci. E ta kere con a actua, e forma con a atende cu henter e proceso rond di e prestamo causa pa e crisis di pandemia, a laga un sabor amargo atras den comunidad.
Kisas e momento pa propone e Rijkswet (RAft) no tabata e momento adecuado, mirando e situacion di pandemia.
Pero, e ta bisa, e otro realidad ta cu si na Aruba mes, den Gobierno y Parlamento, no por cumpli cu normanan financiero pa logra un finanza publico na ordo, mester tuma pasonan cuadro den cual mester traha. Y pa mantene na dje. E ta referi na cuentanan anual cu no ta keda cla na tempo.
Gobierno dialuna anochi “a pronk cu 25 miyon extra cu a logra. Mi kier recorda pueblo cu e 25 aña ey Gobierno a sac’e for di boso saco, cu aumento di BBO y BBO na frontera. No bin celebra cu placa cu bo ta haya masacrando pueblo, afectando nan calidad di pueblo. Y blof cu placa di pueblo bisando cu ta hibando un bon maneho financiero, cual no ta e caso. Locual ta haci ta pone medida y ranca placa for di pueblo y bin gaba cu tin placa.”
E ta bisa cu Gobierno ta bluf cu e surplus mientras cu den mesun seno tin hopi cos ainda pa regla. No por ta posibel cu un Minister Plenipotenciario a haci y deshaci cu placa di pueblo na Aruba, y awo ta bisa djis paga bek … y no mester paga e consecuencianan huridicamente.
Lider di MAS drs. Marisol Tromp no ta mira nan mes den e expresionnan di Presidente di Parlamento ora cu e ta expresa su mes politicamente. Den e funcion cu Vrolijk ta ocupa, e ta haya cu e mester mantene su mes den un forma neutral.
Di otro banda, tur e preocupacion treci dilanti, a vocifera esaki caba den un documento entrega. MAS mes a vocifera nan pensamento for di aña pasa caba den un documento. El a bisa cu e reformanan ta algo cu Prome Minister mes a aproba. “SI a mehora y cumpli cu loke a firma den e documentonan, awe, tres aña despues, lo ta hopi mas leu. Pero awo ta tranca y cada bes ta cambia algo.
Parlamentario Tromp a menciona e anuncio di 25 miyon di inversion. Pero, e no por keda sin menciona cu tur hende sa cu e 6.9% di refinanciamente, ta pone cu pueblo mester scupi cada aña e 30 miyon florin cu ta sali na interes. E placa aki ta bay wordo saca for di e mesun pueblo. “E situacion financiero no ta manera e ta mustra y manera e mester ta. P’esey nos a bisa cu ta apoya reformanan y no keda schuif e asunto. Mester haci e cosnan awo pa mañan tin e rosea bek.”
Lider di fraccion di AVP, drs. Mervin Wytatt Ras, ta kere cu na Sint Maarten e Presidente di Parlamento ta papia cu boca grandi y ta papia di union. “Pero na Aruba su Prome Minister cada biaha ta bay di acuerdo cu Hulanda. Pakico na Aruba e no ta para su Prome Minister, pakico e no ta para fuerte ora cu nos ta haci pregunta skerpi pero ta stop nos como Parlamentario di papia. Y e no kier pa nos papia. Pero na Sint Maarten e kier ta manera un Tiger di Papel. Haci manera cu e tin bos halto cu Prome Minister. E mester ta consecuente den loke e ta haci, riba e tema aki, pa ta un front. Hulanda no mester ta nos enemigo. Nos mester por delibera cu Hulanda, pero door di e falta di capacidad di Prome Minister y esunnan cu ta grita, Hulanda ta haya chens di dividi y conkista. Si tin un otro Gobierno na Aruba, cos lo ta diferente, el a duna di conoce.
E Parlamentario independiente Rycon Santos Do Nascimento no ta mira Vrolijk di ningun otro forma cu un “ja knikker”, pa bisa loke Evelyn Wever Croes kier pa nan bisa. E ta haya cu si Vrolijk ta sinti su mes asina revolucionario, di con e no ta pidi independencia di Aruba. “Di con bo no ta bay Nacionnan Uni y haci algo serio. Bo ta sigui yora y haci drama, pero no ta tuma pasonan decisivo.
Ora cu e analisa actuacion di Presidente di Parlamento, e ta conclui cu ta trata di un persona cu no ta studia e materia manera debe ser. Ni e ni Hendrik Tevreden no ta compronde nada di Rijkswet.
“Echo ta cu Evelyn Wever Croes no sa negocia. E ta blo papia di exoneracion di pago, pone su parlamentarionan papia di esaki y awe nos tin 6.9%. Bo ta un negociado teribel. Esey ta realidd di nos politico. Mester studia e material y bira serio den e forma cu ta goberna e pais aki,” el a termina bisando.
