Desde aña pasa Oficina Central di Estadistica a planea pa duna informacion na pueblo kico exacto un censo ta. E intencion tabata pa organisa un Censo pa despues informa comunidad di ki tur informacion a colecta. A palabra cu Archivo Nacional Aruba (ANA) pa organisa e exposicion eynan.
E intencion tabata pa habri esaki pa dia 18 di maart invitando henter pueblo pa bin mir’e, pero COVID-19 a presenta den forma inespera. Segun Desiree Helder, director interino di Oficina Central di Estadistica, nan a dicidi di sigui cu e exposicion ya cu e idea ta pa informa pueblo.
Awor, pa loke ta e Censo mes, lo purba organis’e pero den un otro forma. Awor aki Oficina Central di Estadistica ta evaluando den ki forma por organis’e mas miho posibel y mas compacto posibel.
Pa pasa mira e historia di Censo por bishita ANA durante orario di oficina. Tin biaha ANA lo ta habri riba diasabra, manera e diasabra proximo, di 10:00AM pa 2:00PM. Despues lo invita scolnan.
Awendia ta biba otro compara cu antes. Awo tin mas hende ta biba nan so, hende grandi ta biba nan so, tin mas mama soltera y mas hende ta biba hunto sin ta casa. Helder a bisa cu p’esey ta importante pa haci un Censo pa mira e cambionan ey.
