Tamara Croes, Presidente di Comision di Mayor Colegio Arubano (OCCA) manda un di dos carta pa Obispo di Willemstad, Luis Secco, den cual un biaha mas ta papia di e importancia pa mantene un representante di OCCA den e directiva di Stichting cu ta maneha Colegio Arubano.
Nan ta cuminsa pa splica di loke nan a bisa caba den e reunion di dia 6 di october cu Monseigneur, esta pa mantene un representante di nan den e fundacion SVOA
Dia 6 di october, Comision di Mayor di Colegio Arubano, a aserca Monseigneur cu e peticion, pa mantene un representante di comision di mayor den fundacion SVOA. Comision di mayor ta contento cu Monseigneur a responde parcialmente positivo. For di e actual presidente di SVOA, a ricibi un carta cu ta bisa cu e contenido, ta skirbi riba Monseigneur su peticion. Den dicho carta ta pidi pa comision di mayor propone dos persona, cu entre otro titulo di Register Accountant (RA), pa e directiva nobo di SVOA. E contesta cu comision di mayor a manda pa e presidente di SVOA, Monseigneur a ricibi caba. “Nos a informa e presidente cu nos lo acerca Monseigneur separadamente riba e asunto aki.”
Loke ta tumando luga ta hopi serio y ta preocupa comision di mayor profundamente. Na prome luga, e exigencia cu ta pone pa e candidatonan. Na Corsou tampoco tin dicho exigencia pa miembronan di RK schoolbestuur. Hunto cu e nivel di educacion di e candidatonan, OCCA kier pone integridad y habilidad pa maneha como exigencia.
Na di dos luga, e independencia di enseñansa particular. E actual presidente den directiva di un scol particular, ta representa simultaneamente minister di enseñansa. Pa motibo di e vinculo aki, independencia di enseñansa particular, ta na peliger. Minister di enseñansa por tin necesidad y interesnan, e.o. financiero, pa cual lo kier uza medionan di un fundacion particular. E fondonan di e fundacion particular na prome luga, ta fondonan cu a keda crea cu pago di mayornan e.o na e fondo di buki. Si bay destina e fondo aki pa otro uzo, por ehempel pa asistencia na scol publico, ta haci como si fuera cu e minister ta recobra e subsidio cu a otorga na un fundacion particular. Esaki por trece pa enseñansa particular perdida di e bon nomber y ta un desaroyo sumamente peligroso.
Gobierno Hulandes, den e condicionnan stipula pa bay di acuerdo cu ayudo financiero debi na COVID-19, a stipula cu lo mester haci reformanan tambe den enseñansa. E tipo di envolvimento aki di estado, den directiva di scolnan particular lo ta sigur un punto cu ta debilita credibilidad y lo no ta na fabor di enseñansa particular.
Na di tres luga, riba nivel di directiva:
I. tin reunionnan di directiva actual, ta tuma luga separadamente;
II. ta tuma decisionnan sin tene na cuenta cu participacion di e directiva completo;
III. desde cu e directiva actual a sinta, a conoce solamente minuutnan di un solo reunion cu ta esun
di cambio di statutonan;
IV. ta bini acuerdonan na mesa, sin tuma na cuenta representacion di directiva completo;
V. no tin participacion real, ta e presidente so y netamente e representante di minister, so tin di bisa
y no tin oido pa opinion di otro.
Monseigneur lo ta di acuerdo cu OCCA, cu un proceso asina no ta sano y no ta beneficia ningun mayor ni
alumno y no ta cuadra den e vision di un organisacion catolico serio, cu ta respeta su mes? Comision di mayor kier ta participe y lo apoya cualkier otro modelo di maneho cu ta cuadra cu bon gobernacion, pa separa e maneho diario di scol, for di e nivel strategico di supervision. Comision di mayor lo kier yuda traha na e asina yama “medezeggenschapsraad”/consulta di participacion.
Tanten cu e organo aki, no ta existi ni tin un base legal, comision di mayor ta keda haci un apelacion, pa ta participe riba e nivel di directiva, cu por lo menos un representante. Comision di mayor kier keda cu su repesentacion den e directiva, como un bista vigilante pa e procesonan tuma luga na un forma corecto y cu transparencia. Den e prome carta di dia 6 di october, a splica suficientemente e motibonan, pakico participacion di mayor na e momentonan aki riba nivel di directiva, ta keda importante. “Nos ta spera cu e puntonan aki riba menciona, ta aun mas motibo.”
Comision di mayor tin un tradicion di participacion di mas cu 25 aña. E participacion actual ta un continuacion di e tradicion ey y ta igual na e yamada haci den e recien plan Pastoral di Diosesis. Mayornan pa hopi tempo ta defende e causa di educacion di nan yiunan y no ta desea di perde e bos ey. Nan ta e prome yama pa percura pa e bienestar y desaroyo completo incluso esun spiritual di nos yiunan.
“Como gremio nos ta duna conseho riba desaroyonan di educacion y pedagogico, nos ta e bos cu ta defende interes di nos yiunan, nos ta duna aporte na e plan di maneho y otro plannan manera di siguridad y ta vigila cu esakinan ta keda ehecuta. Nos ta vocifera e deseo di mayornan, specialmente ora ta trata di plannan cu por tin consecuencia financiero pa mayornan. Nos no kier perde e bos cu nos a adkiri despues di tanto aña. Particpacion ta algo esencial den nos comunidadnan. Ta tuma un comunidad pa lanta un mucha.”
Pa e motibonan menciona ariba, OCCA ta haci pa di dos biaha un apelacion riba Monseigneur pa mantene, formalisa den e statutonan di SVOA, e representacion di mayor manera cu e ta actualmente. Mientrastanto lo traha hunto na e cambionan pa institui plataforma di participacion (medezeggenschapsraad) cu mas gremio, por ehempel di docentenan. Nos ta conta riba e sosten di Monseigneur, na bienestar di e educacion di nos yiunan.”