Plan Strategico Nacional adapta debi na pandemia

Minister Xiomara Maduro ta informa cu Departamento di Asunto Economico (DEZHI) a duna un presentacion na Conseho di Minister cu informacion actualisa riba e trabounan di e Plan Strategico Nacional ‘Nos Plan, Nos Futuro’. E plan aki tin como meta guia Pais Aruba pa logra e metanan di desaroyo sostenibel ‘SDGs’ di Nacionan Uni.  E plan tin 9 programa cu ta enfoca riba un desaroyo sostenibel incorporando maneho y accionnan cu ta stimula coherencia riba areanan di maneho economico, social y di medio ambiente.

Plan Strategico Nacional

E Plan Strategico Nacional ta coordina pa Departamento di Asunto Economico conhuntamente cu gruponan multidisciplinario di expertonan local forma pa stakeholders di sector publico, sector priva, NGO’s y academia (EXWG). E plan su vision ta pa aña 2030, mientras cu e obhetivonan strategico y e accionnan ta cubri e periodo di aña 2020 pa aña 2022. Pa garantisa cu e obhetivo- y accionnan ta keda actualisa den e contexto mundial y local cu ta cambia rapidamente, lo traha un di dos periodo di e plan pa e periodo di aña 2023 pa aña 2026 y un di tres periodo di aña 2027 pa aña 2030. Lo haci esaki a base di mantene e vision pa aña 2030 y e metanan di desaroyo sostenibel (SDGs) como base.

Adaptacion di e plan door di COVID19

Recientemente y como consecuencia di COVID 19 a adapta e plan pa inclui accionnan di e Masterplan ‘Repositioning our sails’ p’asina actualisa e plan a base di e necesidadnan actual y necesario pa introduci reformanan pa stimula economia. Hopi di e accionnan den e Masterplan tabata inclui caba den e Plan Strategico Nacional pero algun ta mas specifico debi na e situacion di pandemia cu a trece necesidad pa acelera algun reforma.

Trabounan a continua

Minister Xiomara Maduro ta sigui informa cu e trabounan haci durante ultimo lunanan tabata entre otro cu e grupo di trabou riba indicadornan di e SDG, (SDG-IWG) pa localisa e obhetivo- y indicadornan na e contexto local. Departamento di Asunto Economico a sigui desaroya tambe algun instrumento pa por haci e proceso di priorisa accionnan flexibel y pa prepara nan pa haya financia.

Tambe a crea un cuadro di referencia pa por monitor cada actividad y evalua con implementacion di e plan ta cumpli cu ne y duna asistencia unda cu mester.

DEZHI lo raporta tur kwartaal riba e ehecucion di e plan y mantene Conseho di Minister na altura di e implementacion di Plan Strategico Nacional ‘Nos Plan, Nos Futuro’.