Norman Kuiperi, director di Fundacion Parke Nacional Aruba, a bisa “mi no tin motibo y mi no a leak e carta. Mi ta reta Osyth Henriquez pa prueba cu ami of Parke a leak rapport den prensa.” Tur esaki tin di haber cu e protesta of criticanan cu tin relaciona cu construcciondi Ocean Villas na Savaneta.
Un grupo di Savaneta a denuncia cu Henriquez no tin e permisonan necesario pa construccion cu ta tumando luga aworaki. Pa proba esaki, a mustra copia di un carta cu Parke Nacional Aruba a manda pa Henriquez, pidiendo nan pa para trabou di construccion.
Den e carta ta pidi Henriquez para e trabou pa motibo di iregularidad y/of debi cu no ta cumpli cu tur rekisitonan. Den tur esaki ta cuestiona con e grupo por tin e carta aki cu a sali di PNA pa Henriquez. E ultimo aki ta bisa cu e no a duna ningun hende e carta, y Norman Kuiper a bisa cu e tampoco a entrega e carta na ningun persona.
Loading…
Reload document 
Open in new tab Di loke Henriquez a trece dilanti den su conferencia di prensa diahuebs ultimo, a sinti e insinuacion cu e ta apunta dede direccion di Kuiperi y PNA como esun(nan) cu lo por a leak e carta. Kuiperi su reaccion tabata “ami no a leak nada. Mi ta reta sra. Henriquez mustra evidencia cu Norman Kuiperi of PNA ta tras di leakmento di carta / rapport.”
Na mesun momento cu e ta den situacion di reto, e ta haci otro reto na Henriquez pa mustra tur e permisonan cu e ta bisa cu e tin, relaciona cu e proyecto di Ocean Villas.
Di otro banda, el a bisa, di no ta compronde pakico ta acus’e di leak e carta / rapport pasobra ni su persona ni PNA ta saca beneficio cu leakmento di e informacionnan aki. Y tampoco ta compronde pakico Henriquez ta ataca su persona y parke. E ta lamenta loke Henriquez a bisa contra dje y PNA cu ta sin base y ta sinti cu esaki ta daña su nomber, y difama su nomber den comunidad, sin cu esaki ta corecto.
E bala awo ta na e banda di e inversionista Osyth Henriquez.
