Diahuebs ultimo e funcionario di Wardacosta di Aruba Gerardo Ramon Boekhoudt tabata den corte. Pero e tratamento profundo no a tuma luga ainda.
E motibo ta cu e procesverbaal no ta cla y sin esaki no por manda un caso dilanti di mesa berde. Ley ta bisa cu den dos luna di tempo un caso mester bini dilanti. Berdad ta trece e caso dilanti pero ta informa acusado y defensa e motibonan pakico tratamento profundo no por tuma luga ainda, Y esey a sosode diahuebs ultimo y no por a pone un fecha definitivo ainda tampoco.
Esaki ta nifica cu den cierto cantidad di tempo lo mester trece atrobe dilanti pa wak si e ta cla pa wordo trata. Y si e no ta cla, defensa lo pidi pa laga acusado liber tanten. Ta keda na hues pa studia si esaki ta posibel of no. Tur cos ta depende di seriedad di e caso.
Ta acusa Boekhoudt cu den e periodo di prome di september 2022 te 9 di september 2023, hunto cu otronan, complicidad den importacion di cocaina.
Ta acus’e cu den e periodo di prome di januari 2023 te 22 di maart 2023, hunto cu otronan, a comete mensensmokkel di un persona desde Venezuela (cu a bin na fayece riba lama), mientras cu e mester por tabata sa, siendo miembro di Kustwacht, cu esaki tabata contra ley.
Otro acusacion contra dje ta cu den e periodo di prome di september 2022 te 9 di september 2023, hunto cu otronan, a tuma placa, regalonan y/of promesanan como Kustwachter y a haci cosnan of keda sin haci cosnan contra deber di su cargo, door di duna informacion na personanan, esta, coordenadanan di spotsnan ciego riba lama y locacion di patruyeronan y/of keda sin meld observacionnan desde radar kamer of meld incorectamente, y di haci mal uzo di su posicion como Kustwachter y di a viola secresia.
Por ultimo ta acus’e cu den e periodo di prome di september 2022 te 9 di september 2023, el a participa den un organisacion criminal.
E siguiente biaha cu e presenta den corte ta pa mira riba ki fecha e tratamento profundo lo tuma luga.
