Prome Minister mr. Evelyn Wever-Croes, despues di e conferencia ‘Overseas Countries and Territories Association’ (OCTA) cu a tuma luga na Bruselas siman pasa, unda cu el a tuma e encargo di presidente di OCTA pa e aña aki, el a regresa Hulanda pa diferente reunion, entre otro cu Premier Mark Rutte, Secretario di Estado Alexandra van Huffelen, Minister Rob Jetten y cu miembronan di Eerste Kamer y Tweede Kamer.
Diabierna dia prome di maart, Prome Minister, Minister di Economia mr. Geoffrey Wever y Minister Plenipotenciario mr. Ady Thijsen a reuni cu Secretario di Estado Alexandra van Huffelen. Aruba ta na mesa di negosacion riba e tema di e refinanciamento di debe y ta sigui traha riba esaki.
Prome Minister a indica cu “ainda tin algun informacion cu Gobierno mester busca pa asina sigui combersacion riba e tema, den e dianan venidero”. “Importante ta”, Prome Minister a expresa, “cu Gobierno di Aruba ta na mesa y ta purbando di sali afo pa baha e interes di 6.9% cu Aruba mester bay paga riba e debe di Covid”.
Secretario di Estado van Huffelen lo bishita Aruba dia 20 di maart proximo pa diferente reunion y Gobierno lo continua cu e reunion riba e tema di debe di Covid cu e Secretario di Estado.
Pero, e reunion aki a bin net na momento cu na Hulanda a sali publica contesta di e Secretario di Estado na Parlamento Hulandes, specificamente riba e tema delicado aki. Kisas Aruba a pensa cu como cu e gobierno ta demisionario, cu e gabinete lo por a cambia di oinion. Tres fraccion den Parlamento Hulandes (Groenlinks/PvdA, ChristenUnie y Partij voor de Dieren PvdD) a haci pregunta y e Secretario di Estado a bolbe confirma cu Aruba mes a acorda e ley di Reino pa supervision na aña 2020 y despues a hala atras. Alexandra van Huffelen ta para ariba cu e no ta cambia di opinion y cu sin un Ley di Reino, no tin acuerdo pa interes mas abou.
